GAVMAN i kamapim K19.6 bilien Defisit Baset long Tunde.

Minista bilong Tresera na Memba bilong Kavieng, Ian Ling-Stuckey i tokaut long dispela long palamen.

Bihain long dispela ol i pasim palamen inap long 20 Epril, 2021 we palamen bai holim narapela kibung.

OL 50 memba tasol bilong gavman i stap long palamen i vot long baset.

Spika Job Pomat i tok orait long baset bihainim maus bilong ol memba.

Deputi Praim Minista na Minista bilong Plening, Sam Basil husat i joinim Oposisen i no bin stap long tokaut long Divelopmen baset na hamas baset mani i gat na ol projek gavman bai divelopim.

Oposisen i no bin stap long palamen na gavman i no bin givim wanpela-wik long Oposisen long kisim taim na givim bekim bilong em olsem pasin i stap bipo long gavman i vot long baset.

Moa long dispela ol Memba bilong ol Oposisen i stap long Vanimo, Wes Sepik taim gavman i vot long baset.

Ol memba husat i stap long Oposisen kem i kisim tu ol memba husat i lusim gavman long las Fraide na go joinim Oposisen.

Ling-Stuckey i tok dispela baset i kamap long taim kantri i bungim hevi long ikonomi.

Em i tok 2021 bai wanpela “salensing yia,” bikos long hevi bilong coronavirus (COVID-19).

Dispela baset i winim K18.7 bilien 2020 baset na i bikpela baset long histori bilong Papua Niugini.

Dispela i namba tu baset Ling-Stuckey i tokaut olsem Minista bilong Treseri long gavman bilong Marape.

Em i tok revenu o mani gavman i plen long kamapim em K12.9 bilien (K12,995 milien).

Em i no tok klia long ol wok gavman bai mekim long kisim dispela mani tasol i tok wanpela rot em long sasim ol kampani husat i hait na mekim bisnis olsem i no baim takis long gavman o i no rejista long Invesmen Promosen Atoriti (IPA) long mekim wok.

Narapela em long takis gavman bai kisim long ol bisnis.

Tasol wanpela prodak Ling-Stuckey i tokaut long daunim prais em UHT milk o susu ol i salim long stua.

Em i tok gros domestik prodak (GDP) bai sanap olsem 10 pesen na defisit bai stap olsem K6.6 bilien.