Olgeta provins long kantri i mas kisim was na stap redi long bungim taim nogut bilong COVID-19 sapos COVID-19 i kamap bikpela.

COVID-19 Nesenel Pandemik Rispons Kontrola, David Manning i mekim dispela tok taim em i salim sampela savemanmeri long Nesenel Kontrol Senta i go antap long Morobe Provins long las wik.

“Taim mipela i go het yet wantaim ol rispons bilong mipela long daunim COVID-19, mipela i mas strongim olgeta provins na ol i mas redi na i stap long bungim taim nogut. Stap redi em i ki bilong lukautim yumi yet na sevim laip,” Kontrola Manning i tok.

Wanpela tim bilong ol save manmeri long Nesenel Kontrol Senta (NCC) i bin i go long Morobe provins long helpim provins long redi long daunim COVID-19.

Dispela tim husat i stap pinis long Morobe Provins em ol savemanmeri long Nesenel Dipatmen bilong Helt, World Health Organization na UNICEF. Ol bai wokbung wantaim ol helt wokmanmeri long provins long klinikal menesmen, infeksen privensen na kontrol, mental helt, seveilens, leboratori, risk komyunikesen na Niupela Pasin.

Rebecca Negere i raitim