Gavman bilong Praim Minista James Marape bai i no inap kisim tok orait bilong Palamen long mani plen bilong kantri bilong 2021 long dispela wik.
Dispela senis i bin kamap taim Oposinen i bin kisim sapot bilong ol memba long Fonde las wik long senisim bung bilong Palamen i go long namba wan de bilong mun Desemba.
Fifti seven memba i sapotim Oposisen egensim 39 memba long Gavman long plua bilong Palamen.
Long 5 Novemba, Tresera Ian Ling-Stuckey i bin putim wanpela toksave long midia olsem Gavman bai bringim mani plen bilong kantri long Palamen long skelim long Fraide 17 Novemba.
Tresera Ling-Stuckey i bin tok olsem gavman i laik strongim kantri bihain long ol hevi sik coronavirus i kamapim. Em i tok gavman wok long skelim ol ripot bilong ol bisnis na komyuniti long helpim em long luksave long wanem rot em i mas bihainim.
Tasol plen bilong Tresera Ling-Stuckey long kisim baset i kam long Palamen long dispela wik i no kamap.
Las wik Fraide, Praim Minista Marape i sindaun em yet long sia bilong em long Palamen na 13 minista bilong em i lusim em na go sindaun wantaim ol Oposisen memba.
Oposisen lida Belden Namah i tokim midia long Crown Hotel olsem ol lida husat i joinim Oposisen i bilip olsem kantri i no ran long stretpela rot na senis i mas kamap long lidasip bilong kantri.
Long wankain taim, lida bilong Pipels Nesenel Kongres Pati, Peter O’Neill i tok ol memba i gat 8 milien manmeri bilong PNG long lukautim na ol mas mekim wok long kirapim ikonomi bilong kantri bihain long bagarap i bin kamap bikos long sik coronavirus.
Na long wankain taim, Praim Minista Marape i bin tokim ol jenelis olsem ol pipel i mas stap isi bikos wanem samting i kamap long Palamen em i nomol politik bilong PNG. Em i tok em i gat 52 memba i sapotim gavman na em i bilip olsem gavman bai kisim tok orait bilong palamen long baset bilong neks yia.
Wanpela bilong ol tokwin i kamap bihain long Oposisen i senisim bung bilong Palamen em olsem planti ol memba i no amamas long nupela baset bilong Tresera.
Long las wik Fonde, bipo long Oposisen i surukim sindaun bilong Palamen i go long Desemba, Tresera Ian Ling-Stuckey i bin putim wanpela baset pepa ol i kolim 2021 Budget Strategy Paper. Dispela pepa bilong Treseri Depatmen i soim olsem gavman bai kisim K12. 995 bilien reveniu bilong helpim baset (grants) na long wankain taim gavman bai spendim K19.607 bilien long 2021. Dispela em i soim olsem long 2021 gavman bai sot long K6.613 bilien.
Long painim dispela mani, gavman i bin senisim lo bilong dinau ol i kolim long tok Inglis - debt to GDP ratio - na surukim long 45 pesen i go long 60 pesen. Dispela senis bin kamap taim Palamen i bin givim tok orait long 2020 saplimentari baset na senisim lo bilong baset ol i save kolim - Fiscal Responsibility Act.
Mani mak bilong dinau bilong kantri nau i luk olsem bai K40.998 bilien long 2020 na K46.464 bilien long 2021 dispela pepa bilong Treseri i soim.
wantokniuspepa.com