EUROPEAN Union (EU) long Pot Mosbi i tokaut olsem em i stap sambai long sapotim wok bilong gavman long mekim Independent Commission Against Corruption (ICAC) i wok.

Las wik, Nesenel Palamen i tok orait long Ogenik Lo bilong kamapim ICAC.

European Union i tok amamas long dispela disisen bilong Palamen na i tok dispela i soim promis bilong namba wan step bilong longpela rot.

Em i tok em i gutpela gavman i givim tok orait long dispela lo nau, tasol em i gutpela moa long mekim ol liklik lo na regulesen bilong mekim dispela lo bilong ICAC i wok gut. ICAC bai i nidim tu ol savemanmeri na mani long mekim dispela wok i kamap.

Europen Union i tok em i stap sambai long sapotim dispela wok insait long wokbung bilong en long Good Governance Program, we em i givim K100 milien long ol kain kain ektiviti. Wok bilong pait egensim korapsen em i wanpela bilong ol dispel wok.

Em i tok tu olsem olgeta stekolda long kantri – gavman, praivet sekta, ol divelopmen patna na ol manmeri bilong kantri,  i mas wok bung wantaim long kisim bek PNG long han bilong korapsen na kamapim gutpela samting we yumi olgeta i laikim long en. Yumi olgeta i laikim wanpela kantri we i fri long korapsen, na kantri we olgeta pablik risos i go stret long sevim ol pipel, na moa yet, ol dispela pipel husat i sot tru long ol samting.