Ol memba bilong Nesenel Palamen i bin tok orait long kamapim lo bilong ICAC long kibung bilong Palamen las wik.

Minista bilong Polis, Bryan Karmer i tok pasin korapsen em i wanpela bikpela hevi long PNG na planti manmeri long kantri i amamas olsem dispela ICAC lo bai helpim long daunim korapsen.

Praim Minista, James Marape i tok dispela lo nau bai helpim long stopim pasin korapsen na ol lida bai wokbung wantaim long strongim dispela lo.

Atoni Jeneral bipo na memba bilong Esala, Davis Steven, husat i bin go pas long dispela lo i tok dispela lo em i hatwok bilong planti lain husat i bin helpim kantri i stap long gutpela mak.

Em i tok ol memba bilong palamen long tupela sait wantaim i bin sapotim dispela lo.

Mista Davis i tok ICAC bai stopim korapsen na kamapim gutpela sindaun bilong bihain taim.

Mista Marape i tok ol bai kisim ol ovasis komisina long kam lukautim dispela opis.

Em tok ol bai kisim ol ovasis lain long stopim pasin bilong wantok sistem insait long ol apoinmen.