NESENEL Musium na Art Galeri (NMAG) long Pot Mosbi las wik i pinisim ol wok bilong en long banisim gut na putim ol atifek na relik bilong Wol Woa 2 long Kokoda Trek long liklik haus.

Ol i kolim dispela banis Guvava Weapons Enclosure.

Dispela banis ol i wokim long Alola ples i putim gut ol samting bilong Wol Woa 2 long wanpela hap tasol we i seif na isi long ol visita husat i wokabaut long Kokoda Trek i ken lukim isi tasol.

Pastaim dispela ol relik i slip nabaut long bus long dispela hap na sampela ren i bin pundaun na tait i karim long wara i go.

Bipo long Nesenel Musium i wokim banis ol pipel yet i bin lukautim dispela ol samting. I gat ol samting bilong ol Japan na ol Australia long pait Iong taim ol i bin mekim bikpela pait long Kokoda klostu 80 yia i go pinis.

Ol pipel i bin painim ol Guvava atifek tenpela yia i go pinis taim ol i painim ol samting bihain long ol i harim ol stori bilong Wol Woa.

Sam Sega, wanpela bilong ol dispela pipel long Guvava i tok, “Em i gutpela olsem dispela ol atifek we mipela i lukautim i stap gut insait long haus na banis.”

Dairekta bilong Nesenel Musium na Art Galeri, Dokta Andrew Moutu, i tok insait long plen bilong banisim ol atifek bilong woa, i gat wokbung wantaim ol lokal komyuniti long was na lukautim ol samting bilong ol yangpela i kam bihain, na nau tu i ken kisim save long dispela histori.

Dispela Guvava Weapons Enclosure em i namba tu enklosa o banis NMAG i wokim. Em i hap bilong bikpela plen bilong NMAG na wantaim wokbung bilong ol komyuniti na gavman bilong Australia aninit long Kokoda Inisetiv.