SIR Arnold Amet na Wenceslaus Magun i bin holim wanpela bung long 16, Novemba long Pot Mosbi long tokaut klia olsem ol bai givim namba tu objeksen pas i go long Mineral Risos Atoriti (MRA).

Dispela pas i askim MRA long no ken givim Eksploresen Laisens i go long Niugini Sands Maining. Moa long 10,300 manmeri na pikinini long Sumgilbar LLLG i no bin kisim gutpela na klia toktok long sand maining o maining bilong wesan.

Dispela eria we eksploresen i laik kamap em i 38 skwea kilomita na i gat planti liklik ples na populesen inap long 10,563 manmeri na pikinini.

I no gat gutpela awenes i bin kamap. Na ol pipel i tok nogat long dispela wesan maining.

Laip bilong ol pipel long kostal eria long Madang i dipen long ol kaikai bilong solwara. Na sapos dispela maining i kamap, em bai bringim bikpela hevi long bikpela eria na planti ples bai bagarap wantaim ol kain kain enimal bilong solwara.

Gavman i no ken lukluk tasol long rot bilong mekim mani, tasol i mas tingting tu long lukautim envairomen bilong PNG. Solwara na bus wantaim i gat ol diwai na enimal we lo i tok tambu long bagarapim o kilim.

“Yumi mas lukautim gut envairomen bilong ol pikinini bilong yumi bilong taim bihain. Mipela olgeta i tok nogat long maining bilong wesan,” Mista Magun i tok.

Sir Amet i tok i bin gat tupela woden hearing tasol na awenes i bin kamap long tupela ples we i stap longwe long narapela, na 300 pipel tasol i bin kamap long ol dispela awenes.

Dispela i no gutpela i no rait rot long mekim awenes. Olsem na Sir Amet wantaim Mista Magun na ol pipel long Madang i laik  Sif Woden na Apliken i mekim gutpela awenes long planti ples na kisim tingting bilong ol pipel. Bihain ol i ken presentim risal i go long Maining Edvaiseri Kaunsil.

“Teknikol ripot bai go long advaiseri kaunsil long pinis bilong dispela mun. Na mipela givim 1 wik long ol bai bekim askim bilong mipela. Sapos ol i no wanbel long laik bilong mipela, bai mipela bringim dispela hevi i go long kot,” Sir Amet i tok.

Carolyne Ketsimur i raitim