DIPATMEN bilong treseri i tokaut olsem kantri bai bungim hevi long 2021 nesenel baset.

Seketeri bilong Treseri  Dairi Vele i tokim ol midia long wanpela sotpela miting olsem kantri bai kisim taim bikos long COVID-19 sik na Wol maket prais bilong wel, gas, gol, kopa na nikel long 2018 i kam inap long 2020 i  bin go daun.

Vele i tok kantri bai nidim mani long ol sevis na risos sekta long passim dispela gep olsem na gavman i mas dinau sampela moa mani long helpim baset bilong 2021.

“Mipela nid long adjestim baset long lukluk moa long ol praioriti eria tasol olsem helt, edukesen, polis, lo na oda, rot na infrastraksa.

“Long praivet sekta, ol i nid long klia long wanem samting bai gavaman i praioritaisim long 2021 nesenel baset.

“Sapos yu wanpela liklik konstraksen kampani i wokim wanpela rot long Pot Mosbi o long ol narapela senta neks yia, yu mas no ken tingting long kisim dinau long wokim rot bikos gavman bai i no gat inap mani,” Seketeri Vele i tok.

Em i tok sapos gavman i dinau moa mani long dispela taim nogut bai yumi bekim taim ikonomik i orait gen.

Vele i tok strong olsem yumi inap bekim dinau taim ikonomi i gro gut wantaim pul operesen bilong sevis na ol risos sekta.

“Responsibiliti bilong gavman bilong yumi em long provaidim rot, skul na helt sevis long ol pipel.

“Sapos yupela i mekim olsem long redim baset, ol dispela sampela sekta bai mipela inap praioritaisim na ol inap stap insait long baset,” Vele i tok.

Joseph Dawai i raitim