OL loiya bilong gavman na Oposisen bai gat planti wok long mekim long dispela taim i go.

Opis bilong Oposisen i tok dispela wok bilong senisim gavman na kamapim 2021 Baset i no pinis yet.

Em i tok dispela ol toktok i go long kot na wok i stap yet.

Asde Young and William Lo kampani i makim Oposisen long go long kot long tokaut olsem Tunde Palamen kibung em Spika Job Pomat i askim long kamap, i asua.

Moa long dispela gavman i bin kisim dispela taim long kamapim K19.6 Defisit Baset na dispela i gat asua.

Dispela tok em Oposien i bringim long kot nau i stap long Nesenel na Suprim Kot long Waigani.

Em i no klia wanem taim kot bai sindaun na skelim dispela ol toktok.

Oposisen i go long Kot bikos em i tok mosen bilong surukim palamen kibung i go long 1 Desemba i askim 57, absolute mejoriti, wantaim luksave bilong Klak bilong palamen na Deputi Spika, Koni Iguan i kamap pinis.

Em  i tok sapos Pomat i bihainim Oganik Lo bilong Palamen kibung em i mas go pastaim long Kot long tokaut olsem mosen em Oposisen i kamap long surukim kibung i go long 1 Desemba i asua.

Dispela long wanem aninit long Palamenteri Stending Oda, kain mosen em minista bilong gavman tasol bai kamapim na i no ol memba nating na dispela i kamapim tu lida bilong Oposisen.

Em i tok sapos Spika i save olsem orait em i mas go long kot na kot yet bai mekim disisen sapos em i asua o no gat na sapos i asua orait em i ken mekim dispela long taim kibung i mas stat.

Tasol dispela i no kamap na Spika i singautim kibung we 50 memba bilong gavman i kamap na pasim 2021 Baset.

Gavman i kisim dispela taim tu na surikim kibung i go long 20 Epril, 2021.

I gat bilip olsem dispela i kamap olsem Oposisen i no gat inap taim long kamapim Vot i Nogat Bilip (VONC) long gavman.

Long dispela taim planti memba bilong Oposisen i stap long Vanimo, Wes Sepik na i no gat inap taim long ol i kamap long kibung bilong Tunde.

Wantok Niuspepa i kisim tok long Opis bilong Oposisen lida olsem: “Kamap bilong dispela kibung wantaim 2021  Baset i gat asua.

“Spika yet i no inap long singautim dispela kibung.

“Sapos Spika i laik sensisim mosen bilong surukim kibung long 1 Desemba, orait em i mas go pastaim long kot na kot yet bai mekim disisen long taim kibung bai kamap.

“Spika i no inap go stret na singautim dispela kibung.”

Opis bilong Oposisen i tok sapos Spika i laik singautim kibung orait em i mas givim toksave long ol memba 7 o 14 de bipo long kibung i kamap.

Em i tok dispela i no kamap na kibung i kamap daunbilo long 24 aua tasol.