POLIS o Royal Papua Niugini Konstabulari (RPNGC) i luksave olsem ol pipel bilong Papua Niugini i nau lusim bilip bilong ol long ol polis opisa na ol wok bilong ol polis olsem nau na ol i laik kisim bek bilip bilong ol pipel.

Wanpela samting RPNGC i mekim long kisim bek bilip bilong ol pipel em long kamapim Polis Stesin ov Ekselens long Waigani, Pot Mosbi. I no longtaim i go pinis Praim Minista James Marape i bin opim dispela Stesin.

Australian Federal Polis i givim K4.6 milien long kamapim dispela stesin insait long PNG-Australia Polising Patnasip (PNG-APP) program. Dispela fesiliti em stap long mak bilong intenesenel na i gat ol CCTV o kamera we i ken lukluk long ol wok bilong ol polis opisa insait long stesin na tu insait long ol polis kar tu.Dispela em long daunim korapsen o paul pasin na apim gutpela wok insait long polis fos.

Komisina bilong Polis, David Manning i tok dispela em i namba wan taim we kain samting i kamap insait long RPNGC long 138 krismas we RPNGC i bin kamap long PNG.

Em i tok bikpela tingting bilong kamapim dispela Polis Stesin ov Ekselens em long stretim gen ol polisman na meri wantaim wokmak bilong ol na kisim bek bilip bilong ol pipel bilong PNG.

Polis Komisina Manning i tok, dispela Polis Stesin ov Ekselens bai kamap namba wan piksa we menesmen bilong polis bai lukim na senisim ol arapela polis stesin insait long kantri.

Bipo long ol i opim dispela stesin, Polis Stesin Komanda Sif Saiden Bill Werake i holim tupela de trening long trenim ol memba bilong stesin. Ol dispela memba em ol i makim ol long wan wan stesin insait long NCD long lukautim Polis Stesin ov Ekselens.

Sif Saiden Werake i tokim ol opisa bilong en long ol i mas stretim ol yet na karimaut gut wok bilong ol olgeta taim.

Rebecca Negere i raitim