PRAIM Minista James Marape i opim namba wan nesenel samit o kibung long toktok long pinisim vailens namel long ol man na meri insait long kantri long 8-10 Novemba long Pot Mosbi.

Bikpela hettok bilong dispela kibung em ‘Nau em i taim: Yumi bung wantaim long stap long seim mak’.

Dispela hettok i putim wanpela wok mak na i singaut long olgeta pipel long kantri long kamap long dispela mak na pinisim olgeta kain vailens.

Long wol olgeta Papua Niugini i gat nem nogut tru long bagarapim ol meri, vailens long saspek bilong soseri na kamapim kain kain valiens na em i taim mipela ol lida i sanap na paitim dispela pasin nogut, Gavana bilong Nesenel Kapitel Distrik na host bilong dispela samit Powes Parkop i tok.

Gavana Parkop i salensim ol lida long ol i mas mekim moa. Em i tok vailenes i kalabusim PNG long kamap long sampela mak long divelopmen bilong en olsem kantri.

Insait long dispela tripela de kibung ol patisipen i serim ol stori bilong ol na tu toktok long wanem ol rot bilong helpim long daunim vailens. Ol dispela patisipen i kam long 22 provins makim ol gavman dipatmen, ol sivil sosaiti, ol sios na ol komyuniti.

Long dispela taim tu Deputi Sekreteri Jenerel bilong United Nations Amina Mohammed i bin joinim dispela kibung na long wanpela vidio na tok amamas long ol lida bilong Papua Niugini. Em i tok, “wol i nidim kain lidasip olsem.”

Long surikim dispela wok i go yet Gavana Parkop i mekim komitmen long sapotim wanpela wankain bung wantaim ol yangpela long neks yia.