Ol Polis long Pot Mosbi i kamapim bel isi namel long ol teksi draiva na ol sekyuriti bilong Jacksons ples balus long Mande bihain long wanpela kros i kamap namel long dispela tupela pati.

Ol sekyuriti long ples balus i tokim ol teksi draiva long putim ol kar bilong ol long wanpela lain tasol na i no tupela lain taim ol i wet long ol pasindia long yusim sevis bilong ol.

Ol teksi draiva i no bin wanbel long dispela toktok na ol i kros.

Bihain long dispela ol teksi draiva i straik na ol i tok nogat long karim ol pasindia. Ol manmeri na pikinini husat i laik yusim teksi sevis i no inap long yusim bikos ol teksi draiva i tok nogat. Olsem na ol manmeri na pikinini i bin wokabaut long ples balus i go long Erima long yusim sevis bilong teksi na bas.

Ol memba bilong Fox yunit i lukim dispela hevi na kwiktaim tru ol i go long Jacksons ples balus na stretim dispela hevi.

Nau ol teksi i wanbel na opim gen sevis bilong ol long ol pasindia long Jacksons ples balus.