WANPELA biknem maining enjinia Sam Kaupa i askim Wafi-Golpu na Nesenel Gavman long wanem hap bilong tok “NOGAT” i givim tok orait long ol long go het wantaim DSTP.

“I luk olsem yupela i no bin harim dispela kain tok bipo olsem na tok ples i paulim yupela,” em i tok.

Kaupa i autim bel kros bilong em bikos Nesenel Gavman na Wafi-Golpu main i no laik harim toktok bilong Morobe Provinsal Gavman na ol pipel bilong Huon Gulf husat ples bilong ol i stap arere long nambis na ol i laik putim dispela Dip Si Teiling Pleismen (DSTP) i kam daun long solwara.

Em i tok inap Wafi-Golpu i mekim teiling dem wankain olsem mipela i bin mekim long Hidden Valley main antap long maunten Hamata, tasol nau ol dispela main tasol i strong putim DSTP,

“Dispela milien kina inap long mekim teiling dem antap long maunten bai ol i givim husat na ol i wok long strong long putim DSTP,” em i tok.

Long Fraide las wik, Envairomen na Konsevesen Minista Wera Mori i toktok long fran pes bilong “The National” niuspepa long gavman bai go het long putim DSTP.

Tasol wanpela asples man bilong Huon Galp long Salamaua LLG Peter Kautu i tok Minista i wok long kisim rong edvais long ol ovasis saentis.

Em i tok ol i kam long PNG long mekim mani na ol i no wari long bagarap we bai kamap long yumi.

“PNG em i kristen kantri na dispela pasin bilong pusim ol nating ol papagraun long agensim laik bilong ol i brukim lo bilong humen raits,” em i tok.

Kautu i tok i gat tupela kain ripot ol saentis i givim na tupela i no wankain.

Saentis bilong Newcrest main na Harmony Gol main Bryan Batterham i tok orait long putim DSTP paip i go daun long solwara tasol saentis husat i makim Morobe Provinsal Gavman profesa Ralph Mana bilong Baiolojikal Saens divisen long UPNG i tok teiling bai givim bagarap long ikosistem bilong eria.

Wankain stadi bilong vais sansola bilong Yunivesiti bilong Teknoloji Profesa Renagi i soim olsem 80 pesen bilong ol pipia i save go daun long wara Markham i no save sindaun long as bilong solwara, em i save bihainim vitiaz i go daun stret long Salamaua na Finschhafen.

Het Bishop bilong Ivanjelikal Luteren sios bilong Papua Niugini rait Reveren Dokta Jack Urame i salim toktok i go long ol 17 distrik bilong ELC-PNG long sapotim ol papagraun long Huon Gulf.

Bisop Dokta Urame i tok ELC-PNG i no inap larim ol pipel bilong em i kisim birua.

Luteren sios bai sanap wantaim Morobe Gavman long pasim DSTP long Huon Gulf nambis.

Joseph Dawai i raitim