OL LAIN husat i save putim yau long harim redio brodkas na infomesen sevis long ol lokal redio stesin long ol provins long Hailans rijon na Morobe, Madang na Galp provins frikwensi bilong medium trensmita nau bai harim gut.

Nesenel gavman i putim nau K1milien i go long Nesenel Brodkasting Koporesen long mekim dispela wok.

Minista bilong Komyunikesen na Infomesen Teknoloji Timothy Masiu i bin kamap long brukim graun seremoni long Fimito long wod 5 Gahuku LLG eria long Goroka, Isten Hailans long Mande.

Em i tok ol manmeri na pikinini long Isten Hailans na ol arapela provins long Hailans rijon na long Madang, Morobe na Galp bai ken kisim gutpela infomesen sevis i kam long dispela projek.

“Dispela projek i samting we mi wantaim ol opisa bilong mi i wok hat tru long kisim na bringim i go long Fimito trensmita stesin long Goroka,” Masiu i tok.

Em i tok amamas olsem dispela sevis em bai i ken i go long ol arapela Hailans provins na ol arapela rijon tu.

Isten Hailans Gavana Peter Numu i tok tenkyu long NBC na Minista Masiu long kain sevis we ol pipel long provins bai i ken kisim gutpela infomesen na redio brodkas sevis.

Em i tok em bai i go het yet long givim helpim long NBC Isten Hailans na sapotim dispela projek.

Nupela memba bilong Goroka, Aiye Tambua i tok tenkyu na givim sapot long dispela projek long i givims evis long pipel bilong Isten Hailans na ol arapela provins.

Sape Metta i raitim