IS NU Briten bai holim bai-ileksen bilong 6-pela wod long lokal level gavman (LLG) long dispela mun.

Ol sia long dispela ol wod i stap nating bikos ol kaunsil i dai o risain long wok bikos long ol i gat hevi.

Meri i bosim ileksen bilong ol wod kaunsil, Theresia Sam i tok long las wik Fonde Minista bilong Provinsal Afeas, Pila Niningi i bin sainim pinis tok orait pepa long dispela ol wod long ol i ken holim bai-ileksen bilong ol.

Em i tok dispela 6-pela wod i stap nating em Gunanba wod long Vunamami Eben Lokal level Gavman kaunsil; Balanataman wod long Raluana LLG long Kokopo distrik, Komgi wod long Lasubaining LLG, Toboina wod long Reinber Livuan LLG (Gazelle), Iawakaka wod long Balanataman LLG (Rabaul) na Marambu wod long Sinivit LLG (Pomio).

Em i tok provins i mas holim bai-ilkesen tu bilong Kokopo bikos Siti Meya i dai.

Moa yet, ol arapela 5-pela wod ol memba i risain long wok na arapela i dai lusim wod i stap nating.

Sam i tok olsem ol kendidet i laik resis long wod kaunsil i mas baim K200 na nominet long LLG bilong ol.

Moa yet, em i tok ol arapela 5-pela de bai ol i nominet long provinsal ilketrol opis long Kokopo.

Long 7- 9 Novemba, ol manmeri bai vot long wan wan wod na kaunting bai stat long Novemba 10 Novemba.

Long wankain taim Sam i tok bihain long ol 6-pela wod memba i kisim ol rits o tok orait win pepa bilong ol i go long ileksen opis we long Novemba bai ol i holim ileksen bilong Kokopo siti meya.

Sam i tok tenkyu long ENB provinsal edministresen long givim mani long kamapim bai-ileksen bilong ol wod kaunsil.

Em i tok tu olsem sapos ol manmeri i laik resis long 2022 jenerel ilekesen ol i mas enrol na putim nem nau.

Michael Novingu i raitim