INDEPENDEN Komisin Egens Korapsen (ICAC) i wanpela long ol ajenda palamen i mas vot long mekim em i kamap lo taim ol memba bilong palamen i bung long neks wik Tunde long las palamen kibung bilong dispela yia.

Narapela bikpela bil palamen bai tokaut long en em 2021 Nesenel Baset o Mani Plen.

ICAC Bil em Palamen i bin plen long tok orait long kamap lo long mun Septemba, tasol dispela i no kamap bikos sampela Memba i tok ol i no klia yet long dispela lo na i laikim sampela moa taim long kisim save.

Dispela bil em Minista bilong Jastis na Atoni Jeneral na Memba bilong Esa’ala Davis Steven i bringim.

Nesenel Kapitel Distrik (NCD) Gavana, Powes Parkop long Grivens Dibet long Ogas palamen kibung i tok em i gutpela palamen i kamapim ICAC Lo tasol dispela bai pasim ol lida long kamapim sampela ol wok long taim.

Em i givim piksa long sampela wok we i mas kamap long NCD long taim dispela i no kamap bikos ol benk i mas ringim em na save gut sapos em i givim tok orait long ol opisa long Fainens Divisen bilong NCD Komisin i laik kisim mani.

“Em wok bilong ol opisa long wokim na long wanem as ol opisa long benk i mas ringim mi long kisim tok orait,” Parkop i tok.

“Em samting mi givim tok orait pinis na signetsa (hanmak) bilong mi stap long pepa pinis.

“Ol manmeri i bung pinis long wok i mas kamap tasol benk i no inap givim mani na wetim yet long kisim tok orait bilong mi.

“Dispela em i westim taim nating.”

Dispela i mekim palamen i surukim taim bilong toktok long ICAC Bil i kam long Novemba kibung.

Taim dispela Bil i kamap lo o Ekt, em bai gat wok bilong mekim wok painimaut na tu givim mekimsave long ol lida (Memba bilong palamen na hetmanmeri bilong ol gavman dipatmen na stetutori ogenaisesen) long pasin korapsen.

Gavana bilong Enga, Sir Peter Ipatas i Siaman long komiti bilong ICAC Bil.

Dispela bai namba tri taim palamen bai traim long vot long lukim sapos dispela bil i ken kamap lo.

Las tupela taim palamen i bin traim long mekim dispela bil i kamap lo em long 2012 na 2018.

Ol memba i save vot tasol long taim namba tri vot i kamap bilong lukim bil i kamap lo, dispela i no save kamap.

Seketeri bilong Jastis na Atoni Jeneral Dokta Eric Kwa husat pastaim i bin stap Seketeri bilong Konstitusinel Lo Rifom Komisin i bin tok wok bilong ICAC bai i no inap stap olsem wok bilong Ombudsmen Komisin.

Em i tok dispela lo bai go moa na givim pawa long toksave long kain mekimsave kot i mas givim long ol lida manmeri.

Narapela lo we i go wantaim ICAC em Wisel Blowa Ekt em palamen i bin tok orait pinis long kibung bilong em long mun Me.

Wisel Blowa Ekt em long banisim ol lain husat i ripot long ol lida manmeri o hetmanmeri bilong ol pablik opis long ol i no ken bagarapim ol lain husat i ripot long ol long pasin korapsen.