SEKETERI bilong Kontsitusenel Lo Rifom Komisin (CLRC), Dokta Mange Matui i sainim kontrak bilong en long ai bilong Gavana Jenerel Sir Bob Dadae i no long taim i go pinis.

Dokta Matui i bin kisim opis olsem Seketeri bilong CLRC long stat bilong dispela yia tasol em i no bin sainim kontrak inap las mun.

Em i wanpela bilong ol tripela het bilong ol ejensi bilong gavman husat i bin sainim kontrak long stap foapela krismas long ol posisen ol i holim. Ol narapela tupela em, Dokta Uke Kombra, Seketeri bilong Dipatmen bilong Edukesen, na Dokta Andrew Moutu, Dairekta bilong Nesenel, Museum na At Galari.

Dokta Matui i tok tenk yu long Gavman bilong nau long bilip long em i ken lukautim kain bikpela opis olsem CLRC we i save mekim bikpela wok long developim kantri na kamapim ol polisi na ol rifom aninit long lo bilong kantri.

“Mi luksave long bikpela wokmak we i kam wantaim dispela kontrak olsem na mi laik tokaut long Gavman olsem taim mi stap olsem lida bilong CLRC, bai CLRC i mekim gut wok na rispon long olgeta singaut bilong wok,” Dokta Matui i tok.

Dokta Matui i tok taim em i sainim kontrak em i kisim strong long wokbung wantaim ol wokmanmeri long CLRC na karim aut CLRC Kopret Plen 2020-2024.

Em i tok dispela i mekim em tingim gen olsem ol pablik sevan i gat liklik taim tasol long mekim wok na insait long dispela taim ol i mas mekim gut wok we i ken helpim kantri na lusim gutpela piksa bilong ol yangpela husat bai kam bihain na kisim ples bilong ol.

Bipo long Dokta Matui i kamap Seketeri bilong CLRC, em bin stap olsem, Komisina bilong CLRC long 2015 yet. Em bin stap olsem Pro Vais Sansela bilong UPNG na em i bin stap olsem Ekseketiv Din bilong Skul bilong Lo.