OL PIPEL bilong Madang distrik long las wik Fraide i sanap na amamas wantaim belisi stret taim ol i lukim longpela lain kar stat long Tapo i ran go insait long taun.

Naispela bilas i welkam long dispela 12 pela nupela polis kar long Jomba provinsal polis hetkwata bilong Madang provins.

Polis Minista na Memba bilong Madang, Bryan Kramer i tokaut olsem kost o mani mak ol i yusim long baim dispela 12 pela nupela polis kar em K2.04 milien.

Mista Kramer i tokaut tu olsem ol dispela kar em polis i baim aninit long patnasip wokbung wantaim Madang Distrik Divelopmen Atoriti (DDA) bihainim kina-tu-kina program. Madang DDA i putim K1 milien na polis i helpim long arapela hap.

Em i tok disisen long ol i kamap wantaim long baim 12 pela nupela polis kar na i no 10 pela kar em bikos long mak bilong mani.

Em i tok ol i baim 12 pela Nissan Patrol kar bikos ol i seivim mani, taim ol i no baim 10 pela Toyota lenkrusa 10-sita kar.

Mista Kramer i tokaut klia olsem ol dispela 12 pela nupela polis kar bai mekim polis patrol wok long rurel na taun eria long Madang distrik.

Em i tok foapela nupela polis kar bai mekim patrol long Trans-gogol rurel LLG, tupela kar bai ol i yusim long patrol long Saut-Ambenob rurel LLG, tupela kar bai patrol long Not-Ambenob LLG na foapela kar bai mekim polis patrol long Madang taun.

Minista Kramer i tokaut olsem namba wan wok nau long mekim em long senisim 12 pela kar em polis yusim olsem haia long wok bilong en.

Mista Kramer i tok “Operesen Mekim Madang Seif Gen” i stap long namba tri wik spesel polis operesen na em i amamas long harim olsem polis em i bringim i go long distrik bilong em i mekim gutpela wok long daunim hevi bilong lo na oda insait long komyuniti,”

Em i tok Madang i bin kisim nem no gut tru olsem “Kapitol bilong kilim man’ olsem na em i bringim polis long klinim ples na bringim bek gutpela nem bilong Madang i kam bek.

Mista Kramer i tok olsem long nau yet moa long 500 ol saspek em polis i mekim save long ol na sasim ol long pasin bilong wokim hombru o ‘yawa’ na salim.

Em i tok spesel polis operesen aninit long ‘Operesen Mekim Madang Seif Gen’ i stap yet na ol yangpela bikhet man long ol ples insait long rurel LLG long Madang i no ken paul na mekim hevi. Polis bai mekim bikpela mekimsave long ol.

JAMES G. KILA i raitim