WOKPAINIMAUT bilong hevi bilong drag long Papa Lealea long Pot Mosbi i stap long han bilong Kraims Dairektoret long Hetkwata bilong Polis na koman bilong Metropoliten long NCD i no stap long mak bilong givim ol apdet long dispela hevi, Metropoliten Suprintenden bilong Nesenel Kepital Distrik Perou N’Dranou i tok.

Em i mekim dispela tok bihain long planti toktok bilong wokpainimaut bilong dispela drag i kamap long sosel midia long Facebook pes bilong NCD/Sentral Divisen Koman.

“Mipela bai i no inap long mekim wanpela samting long dispela keis. Em stap long han bilong Kraims Dairektoret long Polis Hetkwata na wokpainimaut i kamap long dispela,”Metsup N’Dranou i tok.

Mista N’Dranou i tok moa olsem ol bikpela wokpainimaut bilong frod o paul pasin em stap long han bilong Nesenel Frod Skuad.

Em i tok olgeta bikpela waitkola kraim em Nesenel Frod Skuad na Enti-Korapsen Skuad i save karimaut wokpainimaut na ol i gat wanpela dairekta husat i save ripot long Asisten Komisina bilong Kraim.

Em i tok klia olsem NCD Metropoliten Koman i no lukluk long ol dispela bikpela hevi na keis tasol ol i lukautim ol franlain operesen we i save lukluk long ol ektiviti bilong ol Sebeben Polis Stesin, Foks yunit, K9 yunit na wok bilong NCD CID long ol dai i kamap, stil, brukim banis/haus na i go insait, ol kar i lus, ol seksual ofens, pait long strit na ol arapela ofens we i save bagarapim laip bilong ol manmeri.

Em i tok, PPC bilong Sentral na em yet i save ripot long Asisten Komisina husat i lukautim NCD/Sentral Divisen Koman