MOA long 400 pipel long 14 Mail ausait long Pot Mosbi i no gat haus nau bihain long wanpela eviksen i bin kamap long Tunde long dispela wik.

Ol pipel i bin paul taim ol polis wantaim ol ekskeveta masin i kamap long setelmen bilong ol long graun Posen Namba 1221. Dispela graun em i stap arere long Adventure Park na long Pacific Adventist University.

Taim Wantok Niuspepa i kamap ol polis i stap na ekskeveta masin i wok long brukim na rausim ol haus.

Long wanpela kona ol pipel i bung na painim tingting long wanem rot ol bai i go toktok long ol lida long Pot Mosbi.

Aninit long diwai, sampela mama i sindaun karamapim het bilong ol wantaim laplap na lukluk long masin i wok. Long narapela kona wanpela famili i rausim haus bilong ol.

“Mipela i bin kisim evikesen notis tasol gavman i bin givim graun i go bek pinis long Sentral Provins olsem na mipela i baim ol blok na wokim haus,” wanpela i tok.

Gavana bilong Sentral Provins Robert Agarobe i bin toktok long dispela hap graun long palamen pinis. Em i no amamas planti graun bilong Sentral Provins i lus long han bilong ol bikmanmeri long kantri. 

Posen 1221 insait long Koiari rurel LLG i bin stap olsem graun bilong mekim bisnis aninit long Ilimo fam tasol bihain dispela graun i bin go bek long Sentral Provinsal Gavman taim Ilimo fam i pinis.

Gavana Agarobe i sanap strong wantaim ol pipel bilong em long kisim bek olgeta graun bilong ol long Sentral Provins.