NU AILAN Provinsal Gavman aninit long Gavana Sir Julius Chan i givim ol sola (ol samting bilong holim hat bilong san) samting bilong givim lait long ol rurel ples long provins.

Provinsal gavman i givim 100 ol sola pawa samting long Kavieng na narapela 100 long Namatanai distrik long las wik.

Gavman i stat long mekim dispela wok long 22 Oktoba wantaim Panapai, Utu Sekenderi Skul, ol Maiom, Omo, Sodastasha, Web Star, Carteret, Sacred Heart, OLSH, Rawal, Pawa Praimeri Skul na Kopkop Koles. Dispela em long Kavieng distrik.

Long Namatanai distrik gavman i givim ol sola samting long Konoagil LLG na bihain Kalil, Kaboman, Lamasa, Lambom Ailan, Natar, LMN3 na Kait.

Lida bilong Panapai ples long Kaveing, Eliap Malpo i tok tenkyu long Nu Ailan Provinsal Gavman long sapot ol i givim.

“Dispela polisi, ‘Laitim Nu Ailan’ i namba wan polisi bikos maski yumi gat ol haus tasol sapos nogat pawa, bai yumi stap long tudak yet,” em i tok.

“Tasol taim pawa i stap yumi ken mekim kain kain ol samting long strongim laip bilong yumi.

“Ol samting bilong tudak tu i  no ken kam klostu na bagarapim yumi.

“Dispela gavman i gat tingting long yumi na mipela i wanbel long polisi.”

Gavana Sir Julius i tok dispela polisi bai stap yet taim em i stap long gavman.

Em i tok em asua sapos gavman i no strongim laip bilong manmeri.

“Dispela i kamap bihain save God i givim na ona i mas go long em,” Sir Julius i tok.