OL pipel bilong Koiari long Sentral Provins i sapotim Gavana Robert Agarobe na tokim NCD Gavana Powes Parkop long no ken surukim mak bilong siti i go insait long graun bilong ol.

Siaman bilong Evorovo Apa Kesmen Riva, Wagi Joe i askim Gavana Parkop long toktok gut wantaim ol pipel bilong Koiari na Sentral provins pastaim.

Mista Wagi i mekim dispela tok bihain long  wanpela bel kros bilong Agarobe long Parkop long taim Parkop i tokaut long  kamapim wanpela Skyrail projek na kalsa pak long graun bilong ol Koiari long  Posen 1221.

Dispela kros i kamap bihain tasol long Gavana Agarobe i painimaut olsem malti-milien kina longtem Skyrail invesmen plen bai kamap long provins bilong em, na em i tok dispela em i pasin bilong ol man i save wok hait long kisim samting bilong ol narapela man.

Dispela hap we Skyrail projek bai kamap em i stap long hap graun, Posen 1221, insait long graun bilong ol Koiari long Kairuku-Hiri distrik bilong Sentral provins.

“Taim Sentral provins i lusim Pot Mosbi, mipela i bin i gat K450 milien GST olgeta yia na i wok long go antap yet wantaim planti nupela projek olsem PNG LNG plent, nupela hairo pawa, Rauna haidro, Sirinumu Dem na sampela moa projek,” Agarobe i tok.

Ol papagraun em ol  bikpela  patna bilong dispela projek na NCD Gavana i no bin toktok wantaim ol pastaim long em i bin mekim dispela plen long wokim projek insait long graun bilong ol.

Wagi i tokim Wantok Niuspepa olsem ol yet i no toktok yet wantaim NCD Gavana Powes Parkop na ol i no save long plen bilong bildim Skyrail long graun bilong ol.

“Mipela i no save long rot bai mipela kisim helpim long dispela projek,” Agarobe i tok.

“No gat man i save kisim helpim long projek we ol i no wanbel o sainim pepa long en, na olsem lida bilong ol asples, mipela i mas save long rot dispela projek inap helpim mipela.

“Mipela i ekspiriensim nogut bilong Eda Ranu bikos ol asples nau i no kisim wanpela helpim bilong ol long taim bilong koloniel de i kam inap nau,” em i tok.

Wagi i tok em i bin harim olsem ol bai pulim waia bilong tren long 2018.

“Em gutpela, tasol mipela laik save wanem rot dispela projek bai helpim mipela. NCD Gavana i toktok wantaim mipela pastaim na i no ken mekim samting nating long laik bilong em.”

Joseph Dawai i raitim