LONG Kisim bek PNG, mipela i mas kisim bek ol famili bilong mipela long famili na seksual vailens, Seketeri bilong Konsitusenel na Lo Rifom Komisin (CLRC), Dokta Mange Matui i tok.

Em i mekim dispela tok long taim ol i opim Famili na Seksual Vailens Riferal Patwe Tul Kit Trening long Mande. Moa long 30 Gender Equity and Social Inclusion (GESI) menesa, opisa na ol fokal poin bilong PNG Lo na Jastis Sekta  (LJS) GESI Komyuniti Practice (CoP) seketeri.

“Namba wan samting we i save kamapim sosaiti bilong yumi em famili na sapos famili yunit i no stap stret bai olgeta sosaiti no inap long stap stret,” Dokta Matui i tok.

Em i tok, strongpela kantri i gat strongpela famili yunit we i gat strongpela laikim, na gutpela pasin.

Em i tok tu olsem famili na seksual vailens na Jenda Bes Vailens em ol bikpela hevi we i wok long bagarapim wokmanmeri na bagarapim tu planti hom. Dispela hevi i bagarapim tu ol rot bilong givim sevis, ol meri na ol famili bai no inap long kisim pe. Strong bilong wok bai i go daun na nem bilong kampani o ogenaisesen bai bagarap.

“Taim ol wokples bilong mipela i no stap gut, mipela bai i no inap long karim aut ol plen na program bilong mipela na dispela bai mekim na mipela i no inap long lukim driman bilong mipela i karim kaikai,” em i tok.

Em i tok moa olsem i gat bikpela nid long ol gavman, ol employa, ol sevis provaida, divelopmen patna na bisnis long wokbung wantaim na tingting strong na stretim dispela hevi.

Konstitusenel Lo Rifom Komisin (CLRC) i bung wantaim Konsaltetiv Implementesen na Monitaring Kaunsil (CIMC) long i go pas long dispela wan wik trening we bai pinis tumoro long strongim save bilong ol lain husat i kam long dispela trening na givim ol moa save long stretim ol kain hevi taim hevi i liklik yet.

Jastis Sevises na Stabiliti bilong Developmen (JSS4D) i givim mani na sapotim CIMC long ranim dispela trening.