OPOSISEN lida Belden Namah i askim Praim Minista James Marape long bihainim lo bilong kantri na mekim wok.

Em i tok ol lo i stap bilong helpim Marape i mekim stret wok.

Namah i mekim dispela tok long las wik bihain long taim opis bilong Odita Jeneral i tokaut long bel hevi bilong ol olsem Nesenel Ekseketiv Kaunsil i kalapim ol na mekim wok painimaut bilong ol yet long wok bilong mani em Helt Dipatmen i yusim long Australia Aid (helpim) mani long baim ol marasin bilong haus sik.

“Ol lo bilong bihainim olsem opis bilong Odita Jeneral i stap bilong mekim wok painimaut long rot bilong yusim pablik mani long baim ol samting,” Namah i tok.

“Dispela I bilong lukim pablik akauntabiliti na skrutini i stap.

Em i tok tenkyu long Odita Jeneral Gordon Kega long tokaut long dispela asua em NEC i bin mekim.

Mista Namah i tok em i no luk gut taim Polis Minista Bryan Kramer i tok NEC i bihainim dispela lo bikos ol mani i praivet mani na i no pablik mani.

“Wanem taim tru em AusAid mani i praivet mani?” Namah i askim.

“Dispela mani i kam long pablik Australia gavman mani. As bilong dispela mani i bilong soim olsem ol i yusim long pablik samting.

“Wanem taim dispela mani i kamap praivet? Minista (Kramer) i mas driman na stap.”

“Mipela i gat planti tingting long wei praim minista wantaim NEC bilong em i mekim wok.”

Namah i tok nau mipela i wok long lukim gavman i wok long brukim ol lo long mekim wok.

Em i tok dispela i mekim ol i tingting planti sapos gavman i min tru taim em i tok long “Kisim Bek PNG.”

Long wankain taim Namah i sapotim singaut bilong PNG Tred Yunien Kongres (TUC) olsem kamap bilong Sentral Benk Ekt (lo) em palamen i kamapim long las palamen kibung i no stret.

Em i tok palamen i kamapim dispela lo olsem Sentral Benk i ken prinim ol mani insait long kantri.

Em i tok em i no abrus taim em i tokaut olsem gavman i wok long plen long prinim mani na dispela i no abrus taim palamen i tok yesa long dispela lo.

“Dispela bai kamapim bikpela hevi long foren eksens bilong mipela we mipela i gat bikpela hevi bilong mani.

“Dispela bai mekim ol investa i pret long kam insait long kantri long wok bisnis,” Namah i tok.