WANPELA nupela rotsait maket long Madang-Lae haiwe i go bikpela nau na dispela maket em planti lain i save kolim 'Salat maket' bikos planti salat i gro arere long dispela eria.

Long las wiken ol mama na ol lain bilong Saut Ambenob eria husat i save go kam long Salat maket i bin amamas tru long kisim Wantok Niuspepa long ritim ol stori bilong PNG na ovasis.

Dispela em i namba wan taim tru bilong dispela namba wan Tok Pisin niuspepa bilong PNG i go krungutim dispela nupela maket we i save sevim ol pipel bilong Umin, Asuar na ol arapela viles klostu long Simel wara na tu Gogol bris eria.

Ol mama husat i sindaun salim buai na daka na ol arapela gaden kaikai na kumu i amamas tru taim ol wok lain bilong Ramu NiCo (MCC) i bringim Wantok Niuspepa i go givim ol na tokim ol long ritim na save long wanem ol nius na infomesen long wok divelopmen gavman i kamapim, nius nabaut long ol provins long PNG na tu ovasis nius.

Wanpela mama bilong Umin viles long Saut Ambenob, Lydia Sawai i tok em i amamas tru long save long Wantok Niuspepa bikos em i no save lukim dispela Tok Pisin niuspepa bipo.

Mis Sawai em meri bilong bringim buai na daka bilong em i go salim long Salat maket na planti taim ol lain i ran long PMV bas na ol kar i go kam long Madang-Lae i save stop na baim ol samting em i salim.

Em i tok sampela taim no gat planti kastoma tumas i save go long hap.

Olsem na em i amamas long yusim fri taim bilong em long ridim niuspepa na save long wanem ol nius o stori long sait long gavman, bisnis na divelopmen i kamap insait long kantri.

Ms Sawai i tok tenkyu long MCC kain long bring Wantok Niuspepa i go long Salat maket long sevim ol Wali kantri pipel long nius na infomesen.

James G. Kila i raitim