DISPELA poto bilong Jennifer Baing-Waiko i soim ol pis we i save raun long 200 mita daun long solwara.

JENNIFER Baing-Waiko em i wanpela savemeri long fiseri saiens long Morobe Provins, tasol nau em i mekim planti wok bilong promotim fres ogenik kaikai bilong PNG. Em i serim dispela poto long taim Wafi-Golpu i laik tromoi pipia bilong en long solwara long Huon Galp long Morobe Provins.

Long dispela taim tu ol pipel bilong Morobe i kamaut na tok strong tru olsem ol i no laikim tru Wafi-Golpu main i yusim Deep Sea Tailing Placement (DSTP) long tromoi pipia bilong en insait long solwara bilong ol.

Misis Baing-Waiko i tok dispela ol pis i stap long olgeta hap long solwara bilong Morobe.

Em i tok wanpela grup pis we ol saintis i kolim mesopelagic pis i save stap long mak bilong 200 mita na i go daun moa yet long wan tausen mita. Em i tok dispela em i twailait zon.

Em i tok long nait ol dispela pis i save kam antap long solwara long ol ples i no daun tumas long painim kaikai. Na sampela pis i save kam antap olgeta long solwara.

Bipo long san i kam antap, ol pis ya i save go bek long ol ples bilong ol daunbilo. Tasol sampela dispela pis i no save bihainim dispela pasin olgeta de.

Long dispela hap ol i save stap em i ples bilong klostu 700 kain kain pis, Misis Baing-Waiko i tok.

I no longtaim i go pinis Morobe Fiseri Kopretiv Asosiesen i bin tokaut long wari bilong ol, nogut DSTP i bagarapim pis bisnis bilong ol.

Ol i tok Morobe i gat 3-pela pis keneri i stap na i helpim ikonomi bilong ol, na ol i no laikim DSTP i kam bagarapim dispela bisnis.

Rosa Koian i raitim