PLANTI manmeri long Morobe i tok nogat long “Deep Sea Tailings Placement” (DSTP) plen bilong Wafi-Golpu gol main projek long Wau Bulolo distrik long Morobe provins.

Dispela projek em join ventsa kampani bilong Hidden Veli Gol Main na Newcrest i plen long kamapim long maus bilong Wara Markham klostu long Lae Siti.

Ol pipel long Morobe i kisim ol grup olsem ol papagraun yet long maus bilong Markham na ol arapela ples arere i bin bung wantaim Morobe Provinsal Gavman na ol wod kaunsila na i bin kamap long Sir Ignatius Kilage Stedium long tokaut long bel hevi bilong ol.

Gavana bilong Morobe, Ginson Saonu i bin stap tu long dispela bung.

Planti manmeri i tokaut olsem DSTP bai bagarapim laip insait long solwara na divelopa i mas painim ol arapela rot long wokim teilings dem.

Ol manmeri i bung long kamapim wanpela tingting na tokaut long wanpela tok long wari bilong ol.

Wanpela lida, Giosi Labi i tok strong long wanem as 9-pela palamen memba bilong Morobe i no stap insait long dispela bung na givim tingting bilong ol na sapotim ol pipel.

Em i tok ol i save kisim kaikai insait long solwara na em i nogut sapos dispela DSTP i kamap na bagarapim laip bilong ol.

Em i tok olgeta samting wantaim mani em solwara i save givim mipela na long dispela as, mipela i tok nogat long DSTP.

Em i tok tenkyu long Morobe Gavana, Ginson Saonu, long kamapim dispela bung we olgeta manmeri i mas tokaut long bel hevi bilong ol.

Em i tok, dispela em i wok bilong politiks bikos laip bilong ol manmeri bilong Morobe i bikpela samting.

Wanpela man long Morobe Patrol Pos i tokaut tu olsem ol i save yusim solwara long kukim kaikai na mekim ol arapela bikpela samting na marasin nogut bilong DSTP bai bagarapim ol.

Yunaitet Morobe grup i kam wantaim olpela memba bilong Huon Galp, Sasa Zibe husat i tok bung i win bilong ol.

Mista Zibe i amamas long Soanu i kamapim bung long kisim tingting bilong ol manmeri.

Em i tok tenkyu tu long Ivanjelikal Luteran Sios bilong Papua Niugini (ELC-PNG), long sapot bilong ol.

Em i tok ol manmeri i laikim sastenabel divelopmen we ol i kisim helpim long divelopmen we i no no gat bagarap i kamap long envairomen olsem bus graun, wara, solwara na laip bilong manmeri.

Sanang Zazoring i raitim