MOA long 500 meri bilong Evanjelikel Luteran Sios long PNG long Papua Distrik i statim namba 31 bung bilong ol long Tunde wantaim bikpela seremoni bilong tok tenkyu na givim ofa.

Bihain  long 4-pela yia ol meri long Papua Distrik i holim gen konperens bilong ol. Marimari Luteran Sios long Pot Mosbi i hostim dispela bung.

Konprens bai i ran long 3-pela de aninit long bikpela hettok ‘Meri amamas long bihainim Jisas na mekim wok.’ Rev Kundu Karlg bai i givim Baibel stadi.

Ol meri i kam long Galp Provins, Milen Be, Oro, Sentral na Nesenel Kapitel Distrik.

Nau long dispela taim ol lidameri i luksave olsem planti toktok bai i go bek long COVID-19 na hau em i senisim ol plen bilong ol long wok insait long sios. Wanpela bikpela samting ol i luksave pinis em olsem COVID-19 i bin pasim ol long holim bung long Julai. Na em i pasim tu moa meri long kam long dispela bung.

Long dispela bung tu bai ol i makim ol nupela lida bilong ol long narapela 4-pela yia na long pinis bilong bung bai ol i mekim bikpela seremoni bilong givim wok i go long Milen Be husat bai i hostim neks bung bilong ol.

Ol meri I tok bikpela tenkyu long Lae Biscuit na Abau MP na Minista bilong Helt na HIV-AIDS Puka Temu long sapotim ol wantaim sampela donesen kaikai.

Bung bai i pinis long tomoro Fraide.