WANPELA nupela projek bilong mekim wok eksploresen long nambis bilong Madang i stap nau long plen.

Long Septemba maining woden i bin bung wantaim ol pipel long Talidig Polis Stesin na long Tokain ples. Em ol ples insait long Sumgilbar long Sumkar distrik long Madang Provins.

Dispela projek i laik mekim wok eksploresen long kisim wesan long nambis long Sumgilbar tasol i no gat planti klia toktok yet long wanem samting tru kampani, Niugini Sands Ltd i laik mekim.

Las wik wanpela man husat  i go pas long lukautim ol trausel long dispela hap, Wenceslaus Magun, i toktok planti long projek i no ken kamap.

Mista Magun i tok, “Ol pipel long dispela hap nambis i no laikim dispela projek i mas kamap long ples bilong ol. Ol i salim wanpela pas long Asbisop bilong Madang, Anton Bal, long tokaut long tingting na plen bilong ol.

“Bikpela tok bilong ol em olsem ol i no laikim tru dispela kain projek long kamap.

“Moa long 20 yia nau dispela ol komyuniti i save lukautim ol trausel bilong solwara na mekim ples bilong ol long kam malolo na putim kiau. Na ol pipel i wari olsem wanem nau long dispela wok ol i mekim long helpim envairomen? Mista Magun i askim.

Wanpela notis bilong Mining Rejistra, Stan Nekitel i go long distrik edministreta bilong Sumkar long Septemba 1 i toksave long go bilong maining woden na ol bung em bai i holim long tupela ples; Talidig Polis Stesin na Tokain Ples.

Mista Nekitel i toksave olsem bung bai i kamap long 23 Septemba na sapos ol pipel i laik tok nogat long dispela projek ol i mas salim notis long maining opis long 9 Septemba 2020.

Tasol ol pipel i no bin kisim toksave long taim na ol i salim notis bilong i no laikim projek bihain long Septemba 23.

Ol i singaut tu long moa awenes i mas kamap long ples bilong  ol.

Rosa Koian i raitim