WANPELA meri lida long Is Nu Briten i wari olsem i no gat moa kontrol bilong lo na oda long provins.

Rose Tiralom, mausmeri long Toburute komyuniti long rot i go long Tokua ples balus, i tokim Wantok Niuspepa olsem ol yangpela i no moa pret long gavman na polis i kisim ol.

Em i tok ol yangpela i kisim spak brus, dring hombru na lainim pasin nogut long ol arapela ples na kamapim dispela ol hevi long provins.

Em i tok ol yangpela i pilim olsem ol i ken mekim samting long laik bilong ol yet na no gat wanpela man o meri i mas pasim ol.

Em i askim ol lida bilong provins, na ol memba bilong Palamen long go pas na strongim wok bilong polis na ol komyuniti long daunim dispela ol pasin nogut.

“Ol yangpela i save was na tok lukaut taim yumi laik ripot long polis,” Tiralom i tok.

“Sampela ol papa tu i save givim tok lukaut long meri bilong ol, taim meri bilong ol i laik ripot long man i paitim ol.

“Mipela i stap olsem ol kalabus lain, no gat fridom.”

Tiralom i tok pastaim ol meri i no save pret long wokabaut long ol ples we ol i save wokabaut long en, tasol tude dispela i no stap moa.

“Yumi save kisim ol pikinini bilong yumi i go long skul, wok gaden na ol ples yumi go long ol.

“Long nait ol man i brukim haus kam insait na mekim pasin nogut.

“Taim ol man i paitim mipela na mipela i laik ripot, ol bai hait, pasim mipela na givim tok lukaut.

“Bai mipela i mekim wanem, mipela bai stap kalabus!

Tiralom i tok ol senis long dispela taim i bagarapim tru tingting bilong ol man long soim rispek long ol meri.

Em i tok ol man i no gat moa rispek long ol mama na ol meri.

Em i tok dispela i mekim ol famili yunit i bruk na i no gat gutpela sindaun.

Em i tok long planti hap bilong Is Nu Briten, pasin bilong ol Tolai man i no gat rispek moa long ol meri i no moa stap.

Em i askim ol lokal memba na memba bilong Kokopo, Emil Tamur, long mekim sampela samting long daunim ol dispela hevi.

Michael Novingu i raitim