OL Kalabus manmeri insait long Papua Niugini em ol sitisen bilong kantri na Gavman bilong PNG i kamapim pinis sampela rot long helpim ol dispela lain, Siaman bilong Parol Bod na Seketeri bilong Dipatmen bilong Jastis na Atoni Jeneral, Dokta Erik Kwa i tok.

Em i tokim ol kalabus manmeri long Giligili long Milen Be Provins long namba wan bung bilong Parol Bod long Provins.

“Gavman i kamapim pinis sampela rot long helpim ol kalabus manmeri na Parol em i wanpela bilong ol dispela rot. Narapela rot em Rilis long Laisens, namba 3 em Remission we i save kamap antap long gutpela pasin na arapela em Pawa ov Mesi.

“Rilis long Laisens em i stap aninit long komiti bilong Minista bilong Jastis na Pawa ov Mesi em i stap aninit long kebinet,” Dokta Erik Kwa i tok.

Em i tok moa olsem Minista bilong Jastis na Atoni Jeneral, Davis Steven i save wari tu long ol kalabus manmeri olsem na em i laik kamapim sampela komiti memba long strongim Pawa ov Mesi Komiti we i no bin stap olsem 15 krismas nau. 

Parol Bod aninit long Siaman Dokta Erik Kwa, i go lukim Giligili Haus Kalabus long harim ol eplikesen bilong ol kalabus manmeri.

Minista Davis Steven i tok wok ol Parol Bod i mekim long Milen Be long harim ol eplikesen bilong ol kalabus, i soim olsem legal sistem bilong kantri em i strong na i wok.

Ol lain husat i stap insait long dispela bung em Minista bilong Jastis na Atoni Jeneral, Davis Steven na ol memba bilong Lo na Oda sekta olsem Pablik Solisita Leslie Mamu, Seketeri bilong Nesenel Judisial Staf Sevis, Jack Kariko na Seketeri bilong Konstitusenel na Lo Rifom Komisin, Dokta Mange Matui.

Komanda bilong Giligili Koreksenel Institut, Ray Gideon i amamas long lukim ol lida long het opis i go lukim Giligili haus kalabus.

“Mipela amamas tru long yupela long kam long hia. Dispela em i namba wan taim ol bikman bilong Lo na Jastis i kam lukim ol kalabus manmeri na dispela i givim strong long mipela long go het na mekim gut wok bilong mipela,” Komanda Gideon i tok.

Rebecca Negere i raitim