Polis Komisina na Kontrola bilong Nesenel Pandemik Rispons David Manning i amamas long gutpela wok bilong Sif Jastis Sir Gibbs Salika long kamapim Judisiari Imejensi Setelait Netwok na em i tok dispela bai helpim Royal Papua Niugini Konstabulari na ol arapela ejensi insait long Lo na Jastis sekta.

“Dispela ol imejensi setelait netwok em bilong kot. Tasol mi amamas olsem Judisiari i laik ol arapela memba bilong lo na jastis i ken yusim. Mi tok tenkyu long Sir Gibbs Salika long givim Imejensi Setelait Netwok long RPNGC we i nau stap long Morauta Haus long NCD, NCD Polis Operesen Senta na ol arapela polis stesin long kantri wantaim ol boda long Wewak, Vanimo, Kiunga, Daru, Tabubil, Wutung na Lae,” Mista Manning i tok.

Em i amamas long makim 7,600 memba bilong Konstabulari long kantri long kisim dispela Judisiari Setelait Netwok long Sif Jastis Sir Gibbs Salika.

Mista Manning i amamas tu long Sir Gibbs long gutpela lidasip bilong en long bringim senis insait long Judisiari we i go gut wantaim dispela taim. I no long rispon long COVID-19 tasol, tasol em i apim mak bilong Judisiari i go antap na i helpim Judisiari long mekim gutpela wok long dispela taim.

“I gat bikpela nid bilong mipela long sevim gut ol pipel bilong mipela na dispela i ken kamap taim mipela i gat raitpela man i go pas na lidim mipela. Man husat i gat gutpela tingting na driman long yusim ol raitpela teknoloji long bringim ol senis i kam,” Mista Manning i tok.

Rebecca Negere i raitim