MAN husat i pinis nau olsem Presiden bilong Atonomus Rijon bilong Bogenvil Sif Dokta John Momis, i bin singaut strong long ol pipel bilong PNG long lukautim mama lo bilong kantri.

Em i bin mekim dispel toktok taim e mi bin stap wantaim ol pipel husat i bin bung long amamasim 45 independens aniveseri bilong PNG.

Em i tok yumi mas amamas olsem yumi gat wanpela gutpela na strongpela Mama Lo we i lukautim demokresi bilong kantri bilong yumi. Em i tok sampela long ol kantri, ol save senisim Mama Lo bilong ol klostu klostu, tasol Mama Lo bilong yumi em stap strong yet.

Em bin stori long taim bilong em olsem Deputi Siaman bilong Constitutional Planning Committee (CPC), em i bin go pas long planti long ol wok bilong dispela komiti bikos Siaman bilong dispela komiti i bin Michael Somare yet (nau Gren Sif Sir) husat i bin Sif Minista na em i bin gat bikpela wok bilong ranim nupela kantri.

Em i tok, CPC in bin raun long olgeta hap bilong kantri long kisim tingting bilong ol pipel long wanem kain mama lo ol i laikim, olsem na Mama Lo ol bin kamap wantaim i makim tru laik bilong ol pipel bilong PNG. “Olsem na ol save kolim PNG Mama Lo olsem “Home Grown”, Presiden Momis i tok.

Momis i tok olsem Mama Lo bilong PNG em narakain long ol Mama Lo bilong ol narapela kantri bikos em i gat wanpela hap ol kolim long “National Goals and Directive Principles” we i no stap long planti Mama Lo bilong ol narapela kantri.

Em i tok, em i no gutplela long lukim olsem sampela manmeri i save laik bihainim laik bilong ol yet long kisim ol samting ol laikim maski rot ol i bihainim i brukim lo bilong kantri.  Olkain man olsem em yumi no inap long kolim ol olsem ol stretpela man.

Em i tok yumi ol Bogenvil i mas amamas bikos yumi ken yusim PNG Mama Lo long kamapim Mama lo bilong yumi yet.

Presiden Momis bai pinis long wok politik long namba 25 de long mun Septemba taim nupela Preseiden i kisim sia bilong em.

Momis i bin go insait long wok politik long 1972 taim em bin winim sia bilong Bogenvil Rijonal na em bin holimplanti wok olsem Minista long gavman bilong PNG. Em bin pinis long PNG palamen long kisim wok olsem Presiden bilong Atonomus Rijon ov Bogenvil.

Momisi bin stap long politik long more long 50 krismas.      

I luk olsem dispela em i laspela taim Momis i mekim wanpela pablik toktok olsem Presiden.

Ol skul, Gavman Dipatment na sampela long ol bisnis haus long Buka, Atonomus Rijon bilong Bogenvil i bin pas long makim 45 Independens aniveseri bilong Papua Niugini long Trinde 16 Septemba.

Sampela long ol skul i bin putim kamap olkain pilai olsem tumbuna danis, spots na ol liklik pilai long makim dispela de wantaim ol tisa na ol papa mama bilong ol.

Planti manmeri i bin bung long Bel Isi Park long Buka taun yet we ol memba bilong Bogenvil Polis Sevis i bin go pas long ol ektiviti olsem parade, apim plak na singsing bilong PNG na Bogenvil anthem long makim dispela de.

Paul Wagum i raitim