MOA long 200 polis na PNGDF opisa na em Ilektorol Komisin i givim wok bilong i go pas long lukautim kamap bilong Goroka bai-ileksen.

Dispela bai-ileksen bai lukim ol manmeri i vot long makim lida bilong Goroka long tude.

Isten Hailans Gavana, Peter Numu i tok stap bilong polis na PNGDF opisa bai i ken lukim dispela bai-ileksen i ran gut.

“Tasol wok bilong salim bia i wanpela samting i ken bagarapim kamap bilong ileksen,” Numu i tok.

“Pasin bilong kisim bia i save kamapim planti hevi.

“Isten Hailans Provinsal gavman i kamapim lika ben o tambu we i bin stat long Fraide long wik i go pinis.

“Mi askim ol lain husat i save salim bia long tambu long salim bia long olgeta dispela wik.

Numu i tok em i amamas long lukim i gat inap sekyuriti i stap long olgeta ples bilong vot na dispela bai kamapim gutpela sekyuriti bilong bai-ileksen long kamap.

 “Mi amamas tu olsem ol meri i gat ples bilong ol long vot wankain long ol man tu.

“Dispela i soim kamap bilong fri ileksen we nogat man i subim ol meri long vot long wanem kendidet ol i laik vot long em.”

Numu i mekim las minit singaut long ol manmeri long makim gutpela lida husat i ken kamap, bringim hevi bilong ol long gavman na kamapim ol wok long distrik.

Em i tok Goroka i hetkwata bilong provins na olsem man o meri husat i memba i gutpela lida.

Sape Metta i raitim