Barbara Tomi bipo ripota bilong “Weekend Spots” i stori long taim bilong em long Wod Pablising.

 PASTAIM tru mi laik tok bikpela tenkyu tru bilong mi long Wod Pablising Kampani long bekim pas bilong mi long 1989 taim mi bin pilim olsem mi lus olgeta na i pas long ples i stap klostu 10 mun olgeta bihain long greduesen.

Mi bin pilim daun tru na klostu het i paul tasol i no longtaim bihain long mi salim pas Wod Pablising i salim balus tiket i kam. Hariap tru mi kalap long twin ota balus bilong MAF na lusim ples bilong mi long Wedau long Milen Be na pundaun long bikpela siti long Pot Mosbi bihain long wanpela aua. Taim mi kamap mi kalap nogut olsem Wod Pablising i redim haus bilong mi pinis.

Bihain mi go long opis na mi kalap nogut yet. Tingim. Dispela em i namba wan wok bilong mi. Taim mi kamap mi joinim tim bilong ol meri spots ripota stret bilong Weekend Sports. Edita long dispela taim em Julia Daia-Bore na leit Kairu Laho em narapela ripota.

Em i bin namba wan taim bilong mi long kain traipela siti tasol taim mi wok wantaim ol meri ya ol i helpim mi long fit i go insait long pasin bilong wok na mekim senis long mi yet long stap long siti.

I no bin i gat ol fri wiken long dispela wok. Mi save laikim spots na mi ting taim mi ripot long ol spots olgeta samting em i rait stret long mi. Long taim bilong regula-sisen, mi save raun na kisim stori na piksa bilong soka, netbal, na sofbal long Bisini na sampela taim tenis long Is Boroko na Lon Bol long Murray Barracks. Long kisim stori bilong basketbal mi save go long Hohola, ragbi long PRL na ragbi yunien long UPNG.

Long taim bilong of-sisen em i save hat. Mipela i save go long wanpela sabeb na narapela na narapela gen long kisim ol spots stori long pulimapim ol pes bilong niuspepa. Mipela i save ran i go i kam long ol PMV bas long olgeta kona bilong siti long kisim stori.

Mi tingim bes memori bilong mi em taim mi go kisim stori bilong of-sisen ragbi lig pilai long Kaugere. Ol pilaia na tu ol sapota i save amamas tru long midia i go kisim stori bilong gem bilong ol. Ol i save lukautim mipela gut na no gat hevi i kisim mipela, na mipela i ken kisim ol poto na toktok wantaim ol rait lain na bihain ol i save bringim mipela long bas stop na wet wantaim mipela inap mipela i kalap long bas.

Antap long olgeta dispela na wanem samting mi holim yet em taim mipela i save bihainim ol spots lain na raitim nius bilong ol wok redi na bihain kamap bilong namba 9 Saut Pasifik Gem long graun bilong mipela yet long PNG long 1991.

Mi bin risain long Wod Pablising long 2 Septemba 2004, em wanpela wik tasol na bai mi makim 15 yia wantaim kampani, long go wok wantaim CIMC-FSVAC olsem komyunikesen opisa. Wod Pablising em i no ples bilong wok tasol. Em i olsem famili bilong mi. Ol wanwok i kamap olsem bratasusa na kandreman na kandremeri bilong mi. Ol i kirapim tingting na bel bilong mi long lainim moa na ol i givim stia long mi long laip bilong mi long ol gutpela pasin bilong ol. Ol i givim mi dispela ples we mi inap groim tupela pikinini bilong mi.

Tenkyu tru Wod Pablising long gutpela memori na long givim mi wing long flai olsem jenelis.

Hepi aniveseri!