Minista bilong Infomesen, Komyunikesen na teknoloji Timothy Masiu i toksave long ol manmeri long kantri long putim was long taim ol i yusim intanet o stap insait long ol sosel midia.

Em i mekim dispela tok bihain long infomesen o data bilong 150 menmeri long kantri i lus na i stap long han bilong wanpela kampani we i save skelim data long Saina.

Em i tokaut tu long gutpela bilong Pablik Sekta Dijital Transfomesen Bill 2020 na ol wok we i kamap long hosting na sekyuriti regulesen bilong ol data o infomesen we dispela polisi i tokaut long en na ol arapela tu.

“Taim tok orait i kamap long dispela Bill, data hosting na ol sekyuriti regulesen bai helpim mipela long lukautim ol data bilong ol pipel we ol pablik bodi i save bungim long en.

“Dispela tu i ken givim strong long mipela long luksave long ol lain husat i brukim dispela lo long bihain taim,” Mista Masiu i tok

Em i tok ol pipel i mas tingting gut long wanem samting ol i putim long sosel midia.

 Em i tok strong long ol long sekim praivesi seting bilong ol kwiktaim na pasim olgeta rot bilong ol pesenel infomesen bilong ol i go aut.

Em i tok tu olsem ol i mas senisim paswed bilong email bilong ol klostu klostu na i no ken givim i go long narapela manmeri. Ol i ken skelim ol paswed sapos lo i givim tok orait.

Rebecca Negere i raitim