PAPUA Niugini i gat bikpela hevi long pasin korapsen, Polis Minista Bryan Kramer i tok.

Em i tok dispela pasin i go insait tu long wok bilong polis.

Kramer i mekim dispela tok long bekim askim i kamap long Facebook long as em i no moa mekim planti toktok long dispela taim.

Em i gat planti toktok i kamap long dispela taim long polis i pas long pasin bilong kisim na salim ol drag olsem smok nogut (mariuana) na marasin nogut (cocaine), stilim ol gan long traibel pait na mekim pasin nogut, stilim graun na bagarapim nating ol manmeri.

Dispela toktok bilong Kramer i kamap long Guardian, Australia niuspepa long 18 Septemba, 2020.

Dispela toktok bilong em i bihainim tu toktok bilong Polis Komisina, David Manning olsem i gat ol “raskol” tu i stap long yunifom.

“Mi painim polis bilong mi i gat bikpela hevi long pasin korapsen,” Kramer i tok.

“Dispela ogenaisesen we i gat wok bilong pait egensim korapsen nau i go pas long mekim pasin korapsen.

“Wantaim dispela i no gat disiplin long polis fos.

“Bihain long dispela taim mi stap wantaim polis long las 15 mun, mi ken lukim klia liklik long mak bilong pasin korapsen.

“Korapsen i go insait tru long klostu olgeta samting we wanpela i no inap long save long rot kantri bai bihainim long kamap orait gen.

“Em bai kisim planti jeneresen (yia) long tanim kantri i kamap orait gen.”

Long daunim pasin korapsen Marape-Steven gavman i makim Kramer long kamap polis minista.

Planti manmeri i kalap na singaut taim Marape i kolim nem bilong Kramer long Gavman Haus (Konedobu) olsem polis minista long taim bilong makim ol Minista long Kebinet.

Dispela lukluk i stap yet long Kramer long skruim pait bilong em long rausim korapsen.

Bihainim tingting bilong em, Kramer i statim wok taim em i makim David Manning olsem Polis Komisina na bai wok long “antap i go daun.”

Kramer i bekim tu askim bilong Guardian niuspepa sapos kain wok em i mekim i putim laip bilong em long mak nogut.

“I nogat askim sapos laip bilong mi i stap long mak nogut,” Kramer i tok.

“Sapos yu stap na pasin rot bilong ol manmeri husat i stilim bilien kina pablik mani, ol bai painim olgeta rot long rausim yu.”

PNG i stap 150 namel long 175 long 2019 Trensperensi Intenesenel Korapsen Indeks.

Kantri i stap 15 pesen daunbilo tru namel long ol kantri husat i wok hat long daunim pasin korapsen bihainim Wol Benk Global Gavanens Korapsen Indeks.