MANI ripot bilong Manam Risetelmen Atoriti (MRA) bai kamap long pablik long liklik taim, Minista bilong Fainens Reinbo Paita i tok.

Em i tok dispela bai kamap bihain long Nesenel Ekseketiv Kaunsil (NEC) i tok orait long em pastaim.

Em i mekim dispela tok long bekim askim bilong Memba bilong Bogia, Robert Naguri long Palamen i no longtaim i go pinis.

Mista Naguri i askim sapos dispela ripot i pinis na wanem taim Minista bai tokaut long dispela ripot long pablik.

Em i tok tu olsem sapos em i gat ripot, dispela bai helpim em wantaim bod bilong em long save we mani i stap, kisim na mekim wok long helpim ol Manam manmeri long wok bilong risetelmen.

Em i tok tu olsem wantaim ripot bod i ken save MRA mani i stap gut o nogat.

Na sapos i paul bod bilong em i ken save na givim ripot long Polis frod skwad long mekim wok painimaut na olsem ol i ken mekim wok painimaut tu na sapos i tru bai givim mekimsave long ol lain husat i paulim mani na ol arapela samting bilong MRA.

Mista Paita i tok Odita ripot long MRA i pinis na i stap wantaim dipatmen bilong em.

Em bai toktok wantaim dipatmen, kisim na givim dispela ripot long NEC long givim tok orait.

Em i tok em i bin kisim taim long dispela ripot long kamap bikos long tripela samting.

Namba wan samting em bikos gavman i no save gut long wanem bodi i mas lukautim MRA mani.

Namba tu samting em olsem stap bilong MRA bod i no stret na gavman i laik bai i mas gat gutpela bod.

Tasol em i tok nau olsem bod i stret wantaim nupela bod siaman em Dokta Boga Figa bihain long Ken Fairweather i risain ol gavman i gat bilip long bod.

Na namba tri samting em olsem i gat nupela Sif Ekseketiv Opisa em Richard Baia.

Figa na Baia i gat bikpela save long wok bilong risetelmen bihain long ekspiriens bilong ol long wok maining.

Paita i tok tu olsem nau olsem i gat gutpela bod, gavman nau bai givim mani i go stret long MRA long mekim wok.