DISPELA longpela wet long vot long Goroka bai-ileksen long Isten Hailans bai stat tude.

Vot i mas stat long Mande tasol bikos long ristrening kot oda we 21 kendidet bilong 22 i gat hevi long tok bilong sekyuriti na ol i askim long surukim vot i kam long tude.

 Ol i askim long ol vot pepa sapos i gat asua i stap we ol stilman inap long kisim potokopi na yusim long vot.

Tasol Ekting PNG Ilektoral Komisina, Simon Sinai i tok ol balot pepa i gat ol sekyuriti seriel mak we i hat long ol stilman i ken kisim potokopi long ol.

Bikos long dispela ol toktok, Komisin i surukim de bilong vot long Mande i kam long tude.

Pastaim Goroka Memba na man husat i winim kot long kamapim dispela bai-ileksen, Bire Kimisopa i kisim narapela kot oda long painimaut as bilong sanapim ol sekyuriti kamera.

Em i tok nogut ol kamera i kisim piksa bilong ol long lain i vot na soim stret husat man ol i vot na dispela i no gutpela.

Tasol PNGEC i hop olsem dispela ol tok bai stret long wik na vot bai go het long tude.

Sekyuriti kamera i nupela pasin bilong kamapim gutpela sekyuriti long taim bilong ileksen.

Moa yet, bai i gat ples bilong ol meri tasol long vot. Komisen i plen long bihainim 2017 Jeneral ileksen na plen long kamapim 20 ples bilong vot we bai gat ples bilong ol meri yet long vot tu bai stap.

Komisin i kamapim dispela vot bikos pasin nogut i kamap long ol meri.

Planti taim ol man i save subim ol meri long bihainim laik bilong ol long vot.

Komisin i bin plen long yusim K5.6 milien long vot tasol dispela pepa i klia hamas Komisin i kisim pinis long kamapim ileksen.

I gat tripela meri husat i stap insait long 22 kendidet.

Dispela ol meri em Goroka So Kodineta Keryn Hargreaves, Selina Heriso Kengermar na Mary Pati.

Siting memba Henry Ame husat kot bilong dispyutet riten sia i autim em i resis tu wantaim olpela memba Bire Kimisopa.

Kimisopa i winim kot ov disputet riten long kamapim dispela bai-ileksen.

Nau yet i luk olsem bikpela resis bai stap namel long Ame na Kimisopa.

Olgeta 22 kendidet em  Gipene Pirehu, Independen kendidet; Henry Tutuwo Ame (Pipels Nesenel Kongres) Wilson Orlegge Thomson (Kantri Pati), Steven Rere (Independen), Ben Kua Noel (Independen), Willie Nul Yoba (Independen), Dominic Sintex Gahane (Yunaitet Leba Pati), Bire Kimisopa (Niu Jeneresen), Emmanuel Ijape (Social Demokratik pati), Elijah Gomae (Yunaitet Risos Pati,) Joe Bullet Bulhage (Independen), Jeffrey Sasuwo (Melanesian Alaiens), Kupa Okaro Janis (Independen), Serina Heriso Kengemar (Indipenden), Mary Pati (Model Nesen Pati), Ark Awo Ketaw (Indipenden), Albert Isembo Wamiri (Indipenden), Keryn Hargraeves (Independen), Kiatro Abisinito (Independen), Herbert J. Pokana (Independen), Aiye Humai Tambua (Pangu Pati) na Thompson Haraqa’veh (Independen).