ISHMAEL Toroama em i nupela presiden ilekt bilong Atonomus Rijon bilong Bogenvil (ARoB).

Ritening Opisa Peter Wanga i tokaut long dispela win long asde Trinde moning long Yunaited Sios long Hutjena, Buka, ARoB.

Mista Toroama i resis long 2020 Bogenvil Ileksen makim ol eks kombaten.

Bihain long iliminesen 21 Mista Toroama i winim bikpela majoriti bilong namba bilong vot. Em I kisim 47,145 vot olgeta.

Em i bin wanpela long ol lida i go pas long pasim Bogenvil Kopa Main na pait long kisim bek Bogenvil na em i go pas tu long pusim tingting bilong kisim independens long Papua Niugini.

Bihain long bikpela pait long Bogenvil i pinis em I bin sainim Bogenvil Pis Agrimen we i bin kliaim rot bilong Bogenvil long wokabaut i go long referendum. Dispela referendum i bin kamap las yia.

Planti pipel husat i save long em i tok Mista Toroama em i wanpela daunpasin man, man bilong prea na em i sanap strong long tingting bilong Bogenvil i mas kisim independens.

Olsem wanpela kakao fama Mista Toroama i gat bikpela driman long gohetim bikpela driman bilong Bogenvil.