Dipatmen bilong Jastis na Atoni Jeneral (DJAG) i kisim 200 sola redio long Wantok Radio Light long Gateway Hotel long Pot Mosbi las wik.

Wantok Radio Light em i wanpela Kristen redio stesin long Papua Niugini we i save pleim ol gutpela kristen musik na autim Tok bilong God.

 DJAG i laik wokbung wantaim Wantok Redio Light long karim aut Nesenel Eksen Plen bilong Soseri Akyusesen Riletet Vailens (SARV) long kantri. Tok orait i bin kamap pinis long 2015 long dispela Nesenel Eksen plen i ken kamap.

Deputi Seketeri  long Jastis Edministresen Josephine Pitmur i tok dispela plen i luksave olsem em i no wok bilong gavman tasol long mekim na tu gavman bai no inap daunim SARV long strong bilong em yet.

“Dispela plen i bin kisim tok orait long 2015 na mipela i bin askim long fanding long gavman long planti krismas tasol ol i no givim mipela fanding inap dispela yia olsem na mipela i laik karim aut dispela plen.

“Mipela i nidim ol patna long helpim mipela long karim aut dispela plen na mipela i luksave long Wantok Radio Light olsem wanpela gutpela patna we i ken helpim mipela  long tokaut long ol infomesen bilong SARV. Dispela wokbung bai helpim mipela long kisim infomesen i go olgeta long mak bilong ol grasrut,” Deputi Seketeri Pitmur i tok.

Seketeri bilong DJAG Dokta Erik Kwa, taim em i kisim ol dispela sola redio i tok ol pablik seven i nidim dispela redio long kisim gutpela tingting.

“Mipela i kisim ol dispela redio bikos mi bilip olsem olgeta pablik sevis i stap aninit long planti tingting olsem na mipela olgeta i mas harim Tok bilong God, harim ol gutpela singsing na ol gutpela toktok olgeta de long kisim gutpela tingting,” Dokta Kwa i tok.

Siaman bilong Wantok Radio Light, Fred Tulia i tokaut olsem Wantok Radio Light i amamas long wokbung wantaim DJAG.

“Mipela i amamas tru long DJAG na Lo na Jastis Sekta aninit long lukaut bilong Dokta Erik Kwa i luksave long wok bilong mipela long kantri na i singautim mipela long wokbung wantaim ol. Ol wokmanmeri long DJAG i ken karim ol dispela sola redio wantaim ol long wanem hap ol i mekim wok long dispela kantri na ol i ken harim Wantok Radio Light, 105.0 o 93.09 long Pot Mosbi,” Siaman Tulia i tok.

Dispela redio i save kisim pawa long lait bilong san tasol.

Rebecca Negere i raitim