Pasin bel isi na wok long kamapim gutpela famili na komyuniti i as tok we Memba bilong Gumine Nick Kuman i toktok long ol pipol bilong Gumine long Independens dei long las wik.

Nick Kuman husat i Memba bilong Gumine na Minista bilong Haia Edukesen, Risets, Saiens, na Teknoloji i bin stap wantaim ol pipel bilong en long Gumine long Tunde 15–17 Septemba bipo long em i lusim ol gen.

Wanpela las na bus ples Memba Kuman i go long en, em Elmale, ples bilong Mian-Dimaku wanpisin.

Elmale i las ples olgeta insait long Gumine we moa long 1000 manmeri i stap. Memba Kuman i pundaun long dispela ples long helikopta long belotaim. Kam bilong Mista Kuman i mekim ol mama i holim hauskrai. Na ol papa tu i krai taim ol i toktok long Memba na Minista bilong ol.

 Pasin bel isi na stap wanpela komyuniti i bikpela tok we Mista Kuman i autim long ol Mian-Dimaku long wanem i bin i gat traipela traibel pait i kamap long Domaku we planti manmeri i kisim bagarap, man i dai, na ples i bagarap klostu tupela yia i go pinis.

Mista Kuman i tok gutpela na stretpela pasin wantaim rispekt long ol mama na pikinini bai i kamapim gutpela sindaun.

Ol manmeri wantaim lida bilong ol i amamas long tok bilong Mista Kuman na laik lusim ol pasin birua na mekim wok long kamapim ples bilong ol long wok divelopmen na liklik bisnis.

Mista Kuman i katim mani mak bilong K200, 000 i go long kaunsil wod 21 bilong Gumine LLG long mekim liklik bisnis (SME) na K300,000 long kirapim bek ples wantaim mekim wok long bikrot i kam long Elmale.

Lida bilong Elmale, Gumine Gumankuri Mathias i tenkyu long Mista Kuman long put wod 21 i go long wok divelopmen plen bilong Gumine distrik.

Long tok bilong tok sori Gumankuri Mathias and kaunsil bilong wod 21 Pita i tokim ol lain bilong ol long lusim pasin kros pait na tingting bilong wok long kirapim ples na gutpela sindaun i mas kamap.

“Minista Kuman, long makim maus bilong ol pipel, mi amamas long yu kam luksave long mipela long bikbus hia long Elmale. Tenkyu tu long wok divelopmen nau i wok long kamap long Gumine,” Maima i tok.

ENNIO KUBLE bilong WRight Media i raitim