OL risev polis long Pot Mosbi i no amamas long komisina David Manning long stopim ol long wok moa.

Polis komisina Manning i mekim dispela disisen long stopim ol risev bihainim ol ripot olsem dipatmen i save spendim bikpela mani long stretim hevi ol risev i save mekim long bagarapim nem bilong fos.

Tasol mausman bilong dispela grup risev mista Paul Amango i tok i no planti lain risev i save mekim ol dispela bikhet pasin na em i bagarapim nem bilong ol risev.

Mista Amango i tok dispela stop wok oda tu i mekim lo na oda isu i go antap moa na ol regula polisman na meri i painim hat long daunim ol dispela hevi hariap.

Em i tok dipatmen i mas kamapim wanpela wok painimaut long husat ol dispela lain i save mekim dispela hevi na kisim bek risev long helpim ol polis fos bipo long kantri i gat bikpela lo na oda isu.

Mista Amango husat i save stap long Sabama setelmen i tok ol trabel i wok long kamap bikpela long ol eria olsem Koki na sampela hap bilong Mosbi Saut bikos i nogat polis i wok long ol kain komyuniti olsem ol setelmen.

“Sefti bilong ol manmeri na pikinini insait long wan wan komyuniti em i impoten na polis dipatmen mas mekim riviu kwiktaim long kisim bek ol risev long helpim ol regula polis insait long kantri,” em i tok.

Mista Amango i askim komisina Manning long kisim bek ol risev hariap bipo long krismas bikos long dispela taim planti trabel i save kamap.

Joseph Dawai i raitim