KONTROLA bilong Nesenel Pandemik Rispons, David Manning i singaut long ol provins long apim wok bilong bungim ol sempol bilong mekim COVID-19 test.

“Mipela i mas luksave kwiktaim long ol keis bilong COVID -19, givim medikol kea kwiktaim long ol lain husat i sik na tokim ol lain husat i pas wantaim ol COVID-19 sikmanmeri long stap long haus. Bai mipela stopim sik long i go i kam long dispela rot,” Mista Manning i tok.

Long 22 provins long kantri, 15 provins tasol i salim ripot bilong COVID-19 long wan wan de i go long Nesenel Kontrol Senta (NOC). Olsem na Kontrola Manning i singaut long ol arapela provins long mekim wankain pasin.

Mista Manning i askim gen ol helt fesiliti long bihainim tingting bilong mekim test na bungim planti moa sempol.

“Mi singaut tu long ol manmeri long Papua Niugini long helpim na lukautim yupela yet. Kisim test em bilong sevim laip bilong yu yet, ol famili na ol pren bilong yu na komyuniti,” Kontrola Manning i tok.

Mista Manning i mekim dispela tok bikos draiv tru testing long Taurama Acquatic Centre i ripot olsem namba bilong ol manmeri i go long kisim test i go daun.

Dairekta bilong Ekseketiv Sevis long St John Ambulance, Shirellyne Pielo tok i no gutpela tumas long lukim namba bilong ol manmeri i kam long testing i go daun.

Mista Manning i tok laboratori testing tasol i ken tok klia sapos yu gat COVID-19 o nogat na ol lain i gat COVID-19 i ken kisim helpim kwiktaim.

Em i tok tu olsem, em i gutpela long luksave long COVID-19 risal o stetus bilong yu long stopim yu long givim sik i go long ol arapela manmeri.