POT Mosbi Jeneral Haus sik (POMGEN) i holim wanpela lotu long las wik Fonde we ol menesmen na haus sik wok manmeri i givim luksave na tingim wan yia aniveseri bilong dai bilong leit Sir Theophilus George Constantinou.

Sir Theo i bin sevim POMGENen olsem bod siaman long 2013 i kam inap taim em i dai long 10 Septemba, 2019.

Bod siaman bilong POMGEN Peter Graham i tok Sir Theo i gat pasin bilong laikim lo kamapim senis insait long haus sik we ol sik manmeri bai kisim gutpela helpim na marasin taim ol i go long haus sik.

“Em gat visen bilong haus sik, wanpela we em serim wantaim bod, na wanpela em bikpela tumas long em,” em i tok.

“Em i wanpela man bilong olgeta pipel.

“Mi ting sampela bilong yumi save long hamas fainensel komitmen em i mekim long haus sik na helpim ol sampela wok manmeri bilong haus sik.

POMGEN Sif Eksekutiv Opisa Dokta Paki Molum i tok maski em i wanpela liklik sevis, em spesel stret long komemoretim na tingim dispela bikman husat i kontributim planti samting long divelopim na senisim haus sik.

“Insait long 6-pela krismas olsem siaman bilong POMGEN, Sir Theo i givim praivet taim na ol risos bilong em wantaim visen lo bildim level 7 haus sik bilong kantri i go wankain olsem ol arapela moden helt fesiliti long wol we ol manmeri, maski sitisen o forena, bai pilim gut na amamas long kisim kwaliti medikel sevis insait long kantri.

“Em i kam long wanpela bisnis bekgraun, olsem na em abrusim planti ol hevi i pasim em long wok long haus sik, na i helpim long givim mani bilong em yet na dispela i lukim gutpela mak bilong wok i kamap.

“Dispela i gutpela bikos em i wok hariap moa long mak em pablik sevis sistem i wok,’’ Dokta Molum i tok.

Dairekta bilong nesing sevis sista Carol Hosea em gutpela stret long holim dispela memorial sevis long tingim ol sevis Sir Theo i bringim long divelopim Pot Mosbi Jenerel Hospital.

“Leit Sir Theophilus George Constantinou em i wanpela strongpela bosman bilong wok, em i save honest long asesim ol pefomens bilong wok na em no save senisim tingting long ol ekspektesen bilong em na dispela i skulim mi long no ken long lusim ai long wanem em i bikpela samting,’’ Sista Hosea i tok.