BOD na menesmen bilong Isten Hailans Provinsal Helt Atoriit (EHPHA) i wanbel na g givim sampela mani long sapotim wok bilong Kristen Helt Sevis long provins.

EHPHA Sif  Ekseketiv Opisa Dokta Joseph Apa i tok dispela i namba wan taim long ol i helpim na sapotim Kristen Helt Sevis long provins.

“Olsem patna bilong mipela, Kristen Helt Sevis i wanpela bodi we i mekim bikpela wok long helpim gavman givim helt sevis i go long ol manmeri, moa yet long lain husat i stap long rurel ples.

Olsem na bod na menesmen i luksave na kamap long sapotim dispela gutpela sevis em ol sios i wok long mekim,” Dokta Apa i tok.

Siaman bilong Kristen Helt Sevis Fallah Loatigi i amamas long dispela luksave na sapot i kam long EHPHA.

“Mipela bai yusim dispela mani long mekim ol autrits (outreach), imunaisesen (immunisation) na ol arapela wok bilong givim helt sevis long ol komyuniti long ol distrik long provins,” Fallah i tok.

Wan wan yia gavman i save makim namel long K50 milien na K100 milien long baset bilong em long sapotim ol CHS.

Tasol planti taim dispela mani i no save kamap long taim na long mak gavman i makim.

Dispela i save mekim ol CHS i no save givim sevis long mak ol i mas givim.

Moa yet, maski ol wok manmeri bilong CHS i no save kisim pe gut, ol i save givim olgeta taim long mekim gut wok.

Wantaim tingting bilong givim sevis long ol manmeri, ol wokman i gat ol arapela laik olsem skul fi bilong pikinini, salim tok i go i kam, transpot, klos, kaikai na ol arapela bikpela samting.

Ol sios na gavman ejensi wantaim i mekim wankain wok tasol gavman i save givim gutpela luksave long ol ejensi bilong em na i no tingim ol sios ejensi.

Ol sios ejensi wokmanmeri i save givim fri taim na sevis long ol manmeri na i no save askim tumas long pe, maski sapos em i askim bilong apim pe.

Sapos gavman i laik lukim ol manmeri i kisim sevis em i mas givim gutpela sapot long ol sios ejensi tu.

Sape Metta i raitim