KONTROLA bilong Nesenlel Pendemik Rispons David Manning i tok wanpela 71 krismas man long Sentral Provins i bin dai long Pot Mosbi Jeneral Haus sik bihain long em i kisim COVID-19.

Em i tok, dispela dai i apim namba bilong COVID-19 dai long kantri i go antap long  namba 7. Dispela man i bin gat ol arapela sik olsem hai blut presa na planti suga long blut bipo long em i kisim COVID-19.

Mista Manning i tok long Septemba 19, dispela man i bin soim sain bilong skin hat, kus na sotwin na ol i kisim em i go long POMGEN. Long dispela de yet, ol i mekim test bilong COVID-19 long en na ol i painim aut olsem em i gat COVID-19 na em i bin lusim laip.

Tasol ol manmeri wok long Nesenel Operesen Senta husat i save helpim ol lain husat i ringim 1800 200 i tok em i save kisim 10 o 14 de long kamapim risal bilong COVID-19 long leboratori na i gat tupela hap tasol i stap we test bilong COVID-19 i save kamap long en, em Goroka na Brisbane long Australia.

Na olsem wanem na ol i kwiktaim kamapim risal bilong dispela man i dai olsem em i dai long COVID-19 insait long wanpela de taim risal i save kamap bihain long 10 o 14 de na tu laboratori i stap long Goroka na Australia?

O em i tru olsem dispela 71 krismas man i dai long COVID-19?

Rebecca Negere i raitim