Vunabosco, Rabaul: OL Katolik Yut long Is Nu Briten i bin amamas tru long stap long wanpela yut kem we i bin kamap long Vunabosco, Rabaul long 11-13 Septemba, 2020 we ol i lainim ol veliu bilong Salesian Famili.

 Mary Helpim bilong ol Kristen peris i bin ogenaisim dispela kem we i bin kamap long Don Bosco Teknikel Sekenderi Skul long Kokopo.

Bikpela stia tingting (theme) bilong dispela kem em: Kamapim gutpela kristen na sitisen em i save stap stret.

Ol yangpela husat i bin stap long dispela kem i kam long ol Katolik komyuniti long Palnakaur, Tobera, Ramale, Malaguna, Nordup, Bitagalip na Livuan.

Ol yangpela i bin lainim pasin bilong tingting long lukautim ples graun, long karim wanpela naispela prea i go long haus, long joinim famili bilong Salesian na long bringim ol arapela i ken kam kamap gutpela model bilong Kristen na stap stret olsem sitisen long haus, skul na komyuniti bilong ol.

 Insait long olgeta prea, singsing na pilai ol yangpela i harim toktok bilong Laudato Si (Caring for our common home) we Sista Pamela, FMA i givim.

Pater Albert Lenon i salensim ol long kamap kendel lait long givim lait long ol tudak i stap namel long planti yangpela tude.

Bruda Alfred Tarvilip, i bin singautim ol yangpela long lukluk na tingting bek long Papua Niugini na 45 yia Independens bilong en. Bikpela askim em i bin givim em “Olsem wanpela yangpela man o meri long peris na ples bilong mi, mi amamas olsem mi pikinini bilong dispela kantri? How bai mi helpim long bildim dispela kantri?”

 Wanpela isipela na strongpela tok i kam long Pater Moise Paluku we santu Philip Neri i bin mekim pastaim em: “Ran, kalap, mekim nois tasol no ken mekim sin.”

Em i namba wan taim tru peris inap long bungim 190 yut.

Paul Hannette, Don Bosco Misin Grup Lida i raitim