MOROBE Gavana Ginson Saonu i sainim Memorandum Ov Understanding (MOU) wantaim Sif na papa graun bilong Wafi-Golfu main Esra Kwako long dispela wik long Pot Mosbi long tok nogat long DSTP long Morobe Provins.

Dispela MOU i soim olsem Morobe Provinsal Gavman i wanbel wantaim ol pipel bilong Babuaf klen long wok wantaim long projek bilong Wafi Golpu Main.

Sif Esra i mekim tok klia olsem, ol pipel bilong em i wanbel long Wafi Golpu i mas op bek.

Em i tok gavman na ol divelopa i mas painim rot we main i ken wok gut na nogat bagarap i ken kamap long Provins.

Sif Esra Kwako na ol pipel bilong em i tok nogat long divelopa bilong Wafi-Golpu main long mekim Deep Sea Tailing Placement (DSTP) tasol i mas painim gutpela na seif rot bilong main long wok.

“Seifti bilong ol pipel na Provins em bikpela samting. Mi bai pait strong long rait bilong ol pipel bilong mi long Morobe Provins. Nesenel gavman i  mas wokbung wantaim ol pipel na no ken haitim wanpela samting long mipela,” Sif Kwako i tok long taim em i sainim agrimen.

Long taim main i op na wok bek, namba wan praioriti i mas go bek long ol pipel bilong Morobe Provins.

Wafi-Golpu main bai go het long wok na kisim bek PNG bikos em i namba tri bikpela main long Sauten Hemispia.

Gavana Saonu i tok klia olsem olgeta pati i mas benefit long main.

“Wafi-Golpu em wanpela bikpela main na PNG i mas skelim olgeta rot bilong mekim wok i ran gut. No ken tingim mani na hariapim wok. Tingim rait bilong ol pipel,” Mista Saonu i tok.

Em i mekim klia olsem, dispela em i no laspela proses. Em bai sindaun tu wantaim ol narapela sab-klen na kisim tingting bilong ol.

Mista Saonu i bin tokaut olsem, dispela projek i no bilong em long winim ileksen, tasol em bilong bringim gutpela sindaun long ol pipel bilong Morobe na PNG.

Em mekim bikpela singaut i go long olgeta saveman bilong PNG long go long Lae sapos ol i gat sampela tingting ol i laik serim long rot bilong opim bek main.

Carolyne Ketsimur i raitim