CELCOR, wanpela envairomen NGO long PNG i tok nogat long koul long PNG.

Insait long wanpela ripot ol i putim aut wantaim Jubilee Australia, CELCOR (Center for Environmental Law and Community Rights Inc.) i tok long planti kantri long wol ol i wok long pasim ol koul pawa fektori bilong ol tasol PNG i tok orait long dispela doti eneji.

Long ol toktok bilong klaimet senis long wol i gat luksave nau olsem koul em i stap namba wan samting we i wok long bagarapim klaimet na ples graun.

Planti kantri i mekim komitmen long helpim long seivim ples graun na klaimet na wanpela rot em long pasim ol koul pawa fektori bilong ol.

Papua Niugini i bin go pas long tingting bilong no ken bagarapim bus na graun long seivim klaimet na ples graun. Em i lukim tu pinis ol hevi bilong klaimet senis, na i rekotim namba wan lain klaimet refuji long Cateret Ailan long Bogenvil taim ailan bilong ol i go aninit long solwara.

Tasol PNG nau i go insait long wokbung wantaim Mayur Risoses, husat i kisim tok orait pinis long mekim wok bilong simen long Sentral Provins.

CELCOR i tok Mayur Risoses, em kampani bilong Australia na em i gat plen long bildim wanpela 52MW koul pawa stesin long Lae.

Long Australia i gat planti pipel i egensim dispela sistem bilong kisim pawa bikos long ol hevi em i kamapim pinis. Australia i no bildim wanpela nupela koul pawa fektori long 8-pela yia nau.

Insait long ripot CELCOR na Jubilee Australia i tok strong olsem PNG i no nidim koul long wanem em bai i kamapim planti bikpela hevi long helt bilong ol pipel na tu long envairomen.

Ripot i tok tu olsem plen bilong yusim koul long givim pawa bai i daunim ol plen bilong kantri long bihaintaim long yusim klin eneji.